1. هذا الموقع يستخدم ملفات تعريف الارتباط (الكوكيز ). من خلال الاستمرار في استخدام هذا الموقع، فإنك توافق على استخدامنا لملفات تعريف الارتباط. تعرف على المزيد.
  2. لقاء وتواصل، مرحبا بكِ يا زائرة :

    لطلب الإستفسار والمساعدة، ضعي سؤالك: هنا. شروحات مهمة لمشاركات مميزة: هنا.
    تسجيل حضوركِ: هنا. إسألي عن أخواتكِ الغائبات: هنا. رسالة لأختكِ: هنا.
    شاركينا مشاعركِ: هنا. عبرّي عن شعوركِ: هنا. لماذا سجلتِ معنا: هنا.
    إستشارة المحتارة، هي زاويتك لطرح مشكلتك بكل أمان، تعرفي على طريقة طلب الإستشارة : من هنا.

  3. تنبيهات مهمة:

    المنتدى نسائي إسلامي، تمنع فيه الموسيقى وصور ذوات الأرواح في الرمزيات والمواضيع.
    لحماية صور مواضيعك من الضياع قومي برفعها على مركز رفع الصور الخاص بجلسات جزائرية بالضغط هنا.
    للتبليغ عن المشاركات المسيئة، يرجى إستخدام خاصية التبليغ بالضغط على أيقونة الموجودة أسفل كل مشاركة.
    حتى لا يحذف موضوعك الذي يحتوي على صور منقولة وعليها حقوق صاحباتها، يتوجب عليك ذكر مصدر النقل إجباريا.

هنا مجتمع نســائي فــاخر، واحة المرأة الجزائرية والعربية، وعالم نسائي متجدد ومتميز ينتظركِ. سجلي الآن وكوني معنا

رواية أسمهان وعبدالرحمن الحلقة (40 )

الموضوع في 'شرفة القصص القصيرة والروايات' بواسطة djalfawiya, بتاريخ ‏20 فبراير 2016.

0/5, 0 أصوات

  1. djalfawiya
    1

    djalfawiya
    Expand Collapse
    عضوية ذهبية

    الإنضمام:
    ‏26 أكتوبر 2015
    المشاركات:
    1,224
    الإعجابات المتلقاة:
    1,677
    نقاط الجائزة:
    3,690
    الإقامة:
    الجزائر
    السن:
    30 إلى 35 سنة
    اسمهان وعبدالرحمن
    الحلقة (40 )



    بدايةً..بارك الله فيكم جميعاً ومشكورين على المتابعة والاهتمام...
    طبعاً بعد مااسمهان وعبدالرحمن تغدوا عند أم عبدالرحمن...طلعوا شقتهم يرتاحون..إلا أهل اسمهان اتصلوا فيها ولما عرفوا انها رجعت بالسلامة عزموها هي وزوجها على العشا...
    وفي الليل قامت اسمهان تتكشخ وتتضبط وراحت لأهلها واستقبلوها بالترحيب..
    أم اسمهان:أسفرت وأنورت واستهلت وأمطرت..ياهلا بالقاطعة اللي مارفعت علينا السماعة بالأسبوعين إلا مرتين!!!
    أسماء:توفر على العريس الفواتير يمه!
    اسمهان:إلا امتحن غلاتي عندكم وأشوف اش كثر مشتاقين لي..
    وجلسوا...
    ابتسام:ماشاء الله كل اللي غبتيه أسبوعين بس دبدبتي!شكلك أقل شي زايدة كيلوين ثلاث!
    أسماء:وافشيلتاه!!يعني يوم كنتي ببيت أبوك يالسمهونة كنتي محافظة على رشاقتك! وبس رحتي عند زوجك قمتي تلغين من كل شي هالحين الرجَّال وش بيقول عنك؟ماشافت خير؟؟
    اسمهان:تصدقون عاد إني فعلاً لاحظت زيادة وزني بالملابس!بس اش أسوي كل ماشفت محل آيس كريم هفني الشوق ورحت وشريت!!
    ابتسام:يعني استانستوا بهاالسفرة؟؟
    اسمهان:بالحيــــــــــــل.. تصدقون ماكان ودي أرجع مهرجانات وفعاليات تجنن..ولا الطبيعة بماليزيا شي ولافي الأحلام!جُزُر خيالية وخضار يشرح القلب..
    أم اسمهان:ماشاء الله.. الله يهنيكم..صدق إن الدنيا حظوظ..انتم مبسوطين ومرتاحين وتركي الله يخلف عليه ويعوضه خير!!
    اسمهان(بفضول):ليش اشفيه تركي؟عبدالرحمن اتصل فيه كذا مرة بس إنه مايرد عليه مدري اش سالفته؟!!!
    قاموا أهل اسمهان وحكوا لها كل قصة عبير مع تركي...
    وتأثرت اسمهان...وقالت:اش هذا أنا مو مصدقة اللي قاعدة أسمعه!كل هالبلاوي صارت بأسبوعين بس؟؟
    أسماء:الصراحة ماندري من اللي لازم ينلام بهالقصة!نلوم الأهل يوم ماأحسنوا الاختيار؟..ولا نلوم تركي يوم انه عطاهم وجه من البداية لين مانهبوه؟ولا نلوم هالأم اللي ماتعرف تربي نفسها وتربي بنتها؟ولا نلوم البنت اللي ماتعرف مصلحتها؟الحمدلله اللي فكه منهم بس!!
    اسمهان:عشان تصدقوني !أنا من بداية هالخطبة وأنا مو مرتاحة..وقلتها من البداية عبير ماتستحق تركي..بس مدري اش كان مطيح سماح وأهلها عندهم أخاف مسحورين هم بعد؟؟
    ابتسام:برَّد قلبي أبوعبير فيهم أخذ كل اللي وراهم وقدامهم وخرجوا من البيت بشناط الهدوم بس وراحوا لخوالهم بالرياض!قليعة!
    اسمهان:الله يبشرك بالخير!يعني عبير مابتدرس معانا ثالث ثانوي!فكه منها!!!
    أم اسمهان:يابناتي حِنا مانتكلم بهالقصة عشان نتشمت بالناس!استغفروا الله بس..أنا موب كاسر خاطري إلا تركي اللي انغش فيهم وحتى أم تركي كانت تحكي لي القصة وهي تبكي مو مصدقة ان ولدها ماطاله السحر!سبحان الله كيف بهاالدنيا ناس ممكن ننغش بظاهرهم..وباطنهم يخبي المصايب...
    اسمهان:بس أنا في شغلة موب داخلة مزاجي!أنا قد شفت جسم عبير المحروق واتصلت أقول لسماح وهي صدتني وقالت انهم عارفين وراضيين!!معقول هم كانوا يدرون ومخبيين على تركي؟؟في هالحالة هم اللي غشوا ولدهم بصراحة!!
    قاموا الجميع يقولون لاسمهان مافهمناك..وحكت لهم اسمهان قصة عبير أيام الاختبارات...الخ
    أسماء:فعلاً شي غريب ومحير!!
    ودق الجرس..
    قالت أم اسمهان:هذيل أكيد محمد وسماح الله يرضى عليكم لاأحد يفتح الموضوع قدام سماح أكيد بتتضايق..إن فتحت هي الموضوع من نفسها بكيفها.. بس انتوا لاتسبقونها بالسؤال!!!
    ودخل محمد يسلم على عبدالرحمن وبعدين جاء يسلم على اسمهان...
    محمد:هلا وغلا بسمهونتنا هلا وغلا والله..واشفيك يابنت انفقعتي انتي وعريسك؟!السعودية مافيها أكل يعني؟؟تقولون سافروا عشان يحشون كروشهم ورجعوا؟؟؟
    سماح:هذي الراحة النفسية وماأدراك وش هي الراحة النفسية!!!
    محمد:عاد من الضغوط اللي كانت تشوفها عندنا!!طول الوقت نوم... وأكل ومرعى وقلة صنعه!!
    سماح:بسم الله عليك واضح انك مبسوطة..كيف السفر حلو؟؟
    اسمهان:يهبل!
    محمد:تصدقون؟قعدت أحلف على سماح ليل ونهار نسافر ونستانس وهي مصرة ماتقضي الاجازة إلا بخرخير!!!وجه فقر وش تقولون بس؟
    ابتسام:وخرخير هذي وين موقعها بالخارطة؟؟
    محمد: مدري بس ان كان عرفتي علميني
    الجميع:ههههههههههه
    سماح:الله أكبر ياالبكش مكة جنب إذني وماأروح لها إلا بالسنة مرة
    اسمهان:على طاري مكة أنا رايحة أعتمر بكرة وبنجلس هناك 3 أيام تخاووني؟؟؟
    أسماء:عاد عروس وتقول خاووني؟هذي كثري منها!!!!
    أم اسمهان:تروحون وترجعون بالسلامة يابنتي..وعسى الله يتقبل منكم ان شاء الله..
    ودخل أبواسمهان وسلم على بنته وقعد ينكت معاها ويضحك..
    اسمهان(وبكل سذاجة):وشفيك يبه صرت تحبني مرة؟؟عشاني طلعت من البيت؟
    ابتسام:أول كنتي لابده على قلبه !وهالحين صرتي ضيفة!يعني وضعك اختلف!!
    أبواسمهان:هههه..وش هالهرج يابنت..إن كنت أحبك صاع فالحين أحبك صاعين!!إنتي آخر العنقود ومايثمن قيمتك إلا من فقدك!!بس شلون عريسك معك ان شاء الله مبسوطة؟؟؟
    اسمهان:تصدقون إن العيشة معاه أحسن من عيشتي معاكم بمية مرة؟؟؟؟؟
    أسماء:أتمنى إنك ماتتراجعين عن كلامك عقب خمس سنين!!!!
    أبواسمهان:ههههه..منتي صاحية ياذي البنت!مثل القطاوى تاكلين وتنكرين!!
    رجع محمد وأبوه للجلوس بمجلس الرجال مع أزواج البنات(اسمهان وأسماء وابتسام)....
    وكملوا الحريم سوالفهم....
    اسمهان:اش هذا ياأسماء؟
    تصدقين كنت متوقعة يوم أرجع من السفر ألقاك ولدتي؟!
    اسماء:الود ودي أولد اليوم قبل بكرة من التعب اللي فيني..بس لسه قدامي كم أسبوع!
    في هذي الأثناء دق جوال سماح وردت:هلا تركي..
    تركي:هلا فيك..وينك صار لي ساعة واقف قدام بابكم أدق الجرس وماتفتحون؟؟
    سماح:أنا معزومة للعشاء عند أهل زوجي..بغيت شي ضروري؟؟
    تركي:أبد كنت زهقان مرة قلت أجي أزورك وأدردش معك..وكنت شاري لأولادك ألعاب بغيتهم يستانسون عليها!
    سماح:ماأنحرم منك ياأخوي..تعال بكرة..
    تركي:لا تعالي انتي خل نتقابل عند الوالدة..
    سماح:على خير ان شاء الله..
    تركي:في أمان الله..
    وصكت الجوال...
    قامت اسمهان تطالع بسماح..
    سماح:هذا تركي فديته كان زهقان ومر علي ومالقاني!
    اسمهان(باستهبال):ليش؟وين زوجته؟مامداه يزهق!!
    سماح:ليش؟مادريتي إنه طلقها؟
    اسمهان(بحركة تمثيلية طقت يدها على صدرها)وقالت:أعوذ بالله!مامداهم يتهنون ببعض!اش اللي صار بس؟
    سماح:من يوم ماسافرتوا صارت أحداث كثيرة..
    وحكت سماح السالفة كاملة لاسمهان أما ابتسام وأسماء كانوا مع أمهم بالمطبخ يسوون السلطات..
    اسمهان:أنا بصراحة مو فاهمتكم شلون متفاجئين من التشويه اللي بعبير مع إني اتصلت مخصوص عشان أنبهك وانتي قلتي لي انكم عارفين وراضيين؟؟
    سماح:متى اتصلتي؟
    وظلت اسمهان تذكرها بالسالفة لين ماقالت سماح:ايه تذكرت بس قسماً إني ماكنت أدري انك تقصدين الحرق كنت أحسبك متصلة تكلميني عن مرضها بالسكري وقلت لك اننا عارفين!!!
    ياشين العجلة اللي فيني ليتني سمعتك للنهاية كان اللي صار ماصار!!!!
    اسمهان:لاتتندمين على مافات..هذا نصيبه معاها وبعدين الحمدلله انه لحق نفسه وماطاح بمكيدتهم..وبكرة ان شاء الله ربي يعوضه باللي أحسن منها!!
    سماح:ليته بس يوافق يتزوج..كان أخطب له اليوم قبل بكرة..بس مو راضي.....
    المهم مرت الليلة على خير وكانت كلها ضحك ووناسة...وبعدها رجعت اسمهان لبيتها وحكت لعبدالرحمن عن كل اللي صار....
    عبدالرحمن:يالطيف يارب..وش اللي قاعد أسمعه؟كل هذا يصير لتركي وأنا موب داري؟؟وأنا أقول اشفيه كل مااتصلت فيه مايرد علي!!!!!
    اسمهان:كنت أقول لك دايماً عبير ماهي زينة وماأحبها وتتضايق مني!شوف تاليتها وش سوت مع ولد الناس؟!!!!!!
    عبدالرحمن:تصدقين اني كنت ملاحظ عليه واحنا بالفندق انه مو مرتاح؟كسر خاطري حيل..بكرة لازم أكلمه وأقابله بمكان..
    وناموا العروسين....
    وثاني يوم كانت الخالة جوهرة رايحة للمطار ومرت على أم عبدالرحمن وودعتها هي واسمهان وعبدالرحمن...
    واتصل عبدالرحمن على تركي وعزمه بمطعم وجلسوا يتبادلون السوالف...وحكى تركي قصته بالمختصر لعبدالرحمن...
    عبدالرحمن:وياترى اش استفدت من هذه التجربة؟
    تركي:استفدت اني ماأثق بمخلوق حتى بنفسي!!
    عبدالرحمن:لا ماعجبني منك هالتشاؤم!إنت انسان مؤمن وحظك أحسن من غيرك..غيرك السحر أهلكه ودمر حياته..لكن انت برحمة..وبالعكس التجارب الفاشلة تعطينا دَفعة معنوية قوية لتطوير ذاتنا وخوض التجربة مرة ثانية بروح معنوية عالية وفيها نوع من المغامرة والحماس مع طموح للوصول للأفضل...وبحسب مافهمت من كلامك إنه أم زوجتك كانت السبب بكل شي يعني الذنب الواقع عليها أبسط من الذنب الواقع على أمها..والتربية الفاشلة اللي ماخلت هذي البنت تتقبل نفسها بالأول هي السبب اللي خلاها تخاف وتكذب على المجتمع لأنها تتوقع انه مابيتقبلها..
    تركي:لاتحاول تأثر علي ياعبدالرحمن حتى لو اني تغاضيت عن عيوبها وضغطت على نفسي وتقبلتها تتوقع انه أمها بتتركنا في حالنا؟؟؟مستحيل!بعدين الحياة اللي تبدأ بكذب وغش ونصب من وين ينكتب لها النجاح والسعادة؟؟
    عبدالرحمن:أنا كل اللي أبي أوصله لك..إنك لازم تكون أقوى..صحيح انك تعرضت للخيانة بس صدقني فيه ناس كثير من حولنا تجرعوا مرارة الخيانة بصور ثانية الله يجيرك منها بس هذا مامنعهم انهم يواصلون حياتهم بكل اصرار وتفاؤل...وأنا عندي ثقة بإنك بتكون أقوى من كل الظروف وتحاول تعيد التجربة بس بنظرة أعمق.ويمر عليك بكرة وانت تتذكر هذي الأحداث مثل سحابة غايمة و مرت!! وبإذن الله ربي مابيخيب لك رجا....
    تركي:الله يسعدك ياعبدالرحمن..ماتتوقع وش كثر كلامك ريحني..وأنا من يوم ماصار اللي صار ماأسمع إلا دعاوي أهلي على أهل زوجتي..بس ماحسيت إنه في أحد حاول فعلاً انه يسهل الموضوع بعيني مثلك!
    ودار بينهم حوار انتهى باستئذان عبدالرحمن من تركي لأنه قبل المغرب ناوي يروح للعمرة مع اسمهان.....
    تركي:الله يوفقكم ويتقبل أعمالكم وعباداتكم..تدري لو عندك أخت؟كنت بأخطبها منك من غير تردد!!
    عبدالرحمن:هههه..بنات الحلال واجد بس إنت توكل على الله وإعزم أمرك...
    وتوادعوا الصديقين...ورجع عبدالرحمن لبيته....
    =============
    راحوا اسمهان وعبدالرحمن للعمرة وهم بالطواف اسمهان طقها الحماس وضاعت من عبدالرحمن وسط الزحمة وقعدت تبكي مثل البزران!!لين ماقابلت شرطي حول الكعبة وقالت:وديني لزوجي الله يخليك!!
    الشرطي:ومنهو زوجك؟؟
    اسمهان:زوجي عبدالرحمن..
    الشرطي:ماشاء الله لهاالدرجة هو مشهور؟؟أقصد كيف شكله؟وش لابس؟؟
    اسمهان(وهي معصبة):يعني شلون بيكون شكله؟رجَّال وبشنبات!!وش بيلبس؟؟واحد معتمر وش تتوقع منه بيلبس؟عباة؟؟لابس ملابس الاحرام؟؟
    الشرطي:لاحول ولاقوة إلا بالله ووين ضيعتيه؟؟
    اسمهان:حول الكعبة وحِنا نطوف!
    الشرطي:ياأختي هذي الكعبة وزوجك مداه جالس يطوف..أنا أقول بدل ماتضيعين وقتك وانتي واقفة كملي طوافك ولاانتهيتي بتلاقينه واقف ينتظرك ان شاء الله!
    اسمهان(وهي تبكي):تهقى؟؟
    الشرطي:استغفر الله!!أروح أكمل شغلي أحسن!
    وكملت اسمهان طوافها وهي تدعي ان عبدالرحمن يرجع لها!!!
    وبعد ماانتهت من الطواف لقيت عبدالرحمن واقف عند صحن الكعبة ينتظرها ويوم لقاها صاحت فيه:وينك إنت؟ليش ضعت مني؟؟
    عبدالرحمن:آسف ياماما!!الحين من اللي ضيع الثاني؟؟أنا مو وصيتك تمسكين يدي؟!
    اسمهان:وش أسوي ؟الحرمة الدبة اللي وراي دفتني على شلة هنود صكوا راسي بريحتهم!ماعدت أدري من وين أروح ولاوين أجي!!
    عبدالرحمن:استغفرك يارب..امشي بس نروح نسعى ولاتسبين في خلق الله وحِنا ببيته!
    وراحت اسمهان تسعى وكل مامشت شوي وقفت تشرب موية وتجلس دقايق ثم تقوم تكمل!!
    عبدالرحمن:اشفيك الله يهديك؟بطريقتك هذي ماراح نكمل عمرتنا إلا بكرة!!
    اسمهان:رجولي توجعني مافيني حيل أمشي!
    عبدالرحمن:معليش..تحملي هالثلاث أشواط وبعدها نرجع الفندق وارتاحي مثل ماتبين!!
    بس أختنا في الله مامداها تكمل شوط إلا وتصيح بذاك الصوت!!
    عبدالرحمن:الله يصلحك فشلتينا اسكتي!وشفيك؟؟
    اسمهان(وهي تتألم):آآآآآي يارجلي!ساقي فيها شد عضلي مو قادرة موقادرة أمشي ردني الفندق!!!
    عبدالرحمن:ماشاء الله عليك!على بالك المسألة لعبة قدامنا شوطين لسه وماانتهينا!شلون نرجع الفندق؟؟
    اسمهان:مو مشكلة..بكرة نرجع ونكمل الشوطين اللي بقت!!!!!
    عبدالرحمن:استغفر الله..أشك إنك قد اعتمرتي بحياتك!!!
    اسمهان:حرام عليك ياما اعتمرت مع أهلي بس إني كنت أحط توقيت بين الطواف والسعي..وبعد كل شوط أجلس شوي وأشرب قهوة وموية وبعدين أكمل!!!!
    عبدالرحمن:زين اقعدي هنا ولاتتحركين وأنا بآخذ شوط وأرجع لك يمكن تتحسن رجلك شوي وتقومين تكملين عمرتك!
    وكان منظر اسمهان يضحك قاعدة على الجلسات اللي في المسعى ومادة ساقها ولافة عليه العباية!
    وجلست جنبها وحدة أندونيسية جاية تعتمر وقامت تدردش معاها وسألتها عن رِجلها وقالت اسمهان:مرة تإلمني ومو قادرة أمشي عليها!
    الأندونيسية:مدام أنا في سوي مساج ممتاز..تبقى انتي مساج؟!
    اسمهان:ايه أبقى!أقصد أبغى!
    ومدت اسمهان ساقها وجلست الاندونيسية عند رجولها ودخلت يدينها من تحت العبات وقامت تمسج اسمهان واسمهان تتألم وتسوي حركات بيدها من الألم..الا عبدالرحمن انتبه للمنظر وهو يسعى وصار يتلفت حوله من الفشلة!!!!
    وجاء عند اسمهان وبعصبية قال:وش هالمسخرة؟ تخلين الحرمة تدلكك قدام الناس لاحيا ولامستحى؟؟؟
    والتفت للأندونيسية وقال:يلا حجة قومي..وشكراً مانبي مساج!
    الأندونيسية:هات فلوس أول!!!
    عبدالرحمن:بعد؟؟؟!!السالفة مو لوجه الله!!وكم تبين؟؟
    الأندونيسية:واهد رِجل 50 ريال!اتنين رِجِل 100 ريال!!
    عبدالرحمن:لا ياشيخة! ماعندك تخفيضات؟احنا بوسط الحرم!
    الأندونيسية:مافي تخفيض!التسئيرة هنا وبره كله سوى سوى!!
    اسمهان:هيا عاد لاتغشينا!ماسويتي لي إلا رجل وحدة..خذي خمسين وتوكلي!!
    وعطاها عبدالرحمن حسابها وقال:هاه؟شلون ساقك بعد المساج؟؟
    اسمهان:الله ياخذها هالحرمة زادت رجلي على مابها من وجع وسدت خشومي بريحة الفيكس!
    عبدالرحمن:يعني الخمسين راحت بلاش؟!!الله يعوض عليك ياعبدالرحمن!اسمعي مالك إلا تكملين الشوطين على كرسي متحرك!
    اسمهان:ياسلاااام؟والناس اش يقولون علي؟جدتك؟؟
    عبدالرحمن:تكفين ياشيخة؟؟
    الناس ماعندهم سالفة بالحرم إلا اسمهان!!!وليش ماخفتي على بريستيجك يخرب وانتي مادة السيقان تدهنهم هالأندونيسية!!!
    وركبت اسمهان على الكرسي المتحرك ودفها عبدالرحمن..لين ماانتهوا..
    وعقبها سألها:هاه؟بشري؟شلونك الحين؟؟؟
    اسمهان:ياااااي وناسة تخيلت نفسي راكبة بالملاهي!!
    عبدالرحمن:استغفرك وأتوب إليك يارب..أنا أشهد إن هاالعمرة يبي لها إعادة!!!!!
    وطبعاً بعد هالعمرة التاريخية راحوا عبدالرحمن واسمهان يقصون شعورهم..وقصت اسمهان أطراف شعرها...
    عبدالرحمن:اسمعي بأوديك الفندق وبأروح للحلاق أحلق شعري..
    اسمهان:ياويلك تخلي راسك أصمع!وجهك من غير لحية وشنب ويالله تقبلته!تبيني أتحمل راسك من غير شعر؟!!هذا اللي ناقص!
    عبدالرحمن:وأحد قايل لك اني بأحلقه على الصفر؟!
    ووصلها الفندق وراح يحلق راسه..
    ودخلت الفندق وكان فخم جداً ودخلت لدورة المياه واستحمت..بس رجلها آلمتها بزيادة وانشدت عضلاتها أكثر من أول وصارت ماسكة رجلها وتبكي!!
    لما رجع عبدالرحمن لقيها متمددة على الكنبة والدموع أربع أربع!!
    عبدالرحمن:خير ان شاء الله؟؟أحد من أهلك صاير له شي؟؟
    اسمهان:لا...
    عبدالرحمن:متضايقة؟ودك نرجع؟
    اسمهان:لا..
    عبدالرحمن:أجل اشفيك؟علميني؟
    اسمهان(وهي تبكي):ساقي توجعني!!!!!
    عبدالرحمن:خرعتيني!سلامات ماتشوفين شر ان شاء الله!أخاف فيكس الأندونيسية ذاك فيه بلا وزاد الطين بله!!!
    ودخل عبدالرحمن يتحمم...
    ولما خرج مازالت اسمهان قاعدة على حالها تدمع!
    عبدالرحمن:ماجعتي؟؟أنا عن نفسي ميت من الجوع!
    اسمهان(تبكي)!!!
    عبدالرحمن:لااااااا شكلنا مابنتعشى اليوم!تبيني أوديك المستشفى؟؟
    اسمهان:إيه ..وقامت تهز راسها..!
    عبدالرحمن:أمرنا لله..
    ولبس ثوبه ونزَّل اسمهان معاه وفقعت مرارته لين ماخرجت من الفندق تمشي خطوه خطوه!!!
    ركبوا السيارة وقعدوا يفترون بسيارتهم لين لقوا مستشفى وأول مادخلوا المستشفى كانت الأجواء باردة جداً من التكييف المركزي!!
    ودخلت اسمهان على الدكتورة وبعد مافحصتها عطتها إبرة مسكنة ووصفت لهادواء ومرهم للعضلات ومشد تلبسه على الساق..
    لما رجعوا الفندق..بدت بوادر المرض تظهر على عبدالرحمن بما إنه استحم وخرج مباشرة للمستشفى اللي مكيفها بارد!!
    يعطس وظهره يألمه!
    طلبوا عشاء من الفندق وتعشوا وناموا من التعب..
    وبوسط الليل صحي عبدالرحمن يشتكي من ظهره!وقامت اسمهان تشوفه وانشدت ساقها!!
    وصاروا الاثنين على قولة القايل ماأخس من زيد إلا عبيد!!
    وعلى صلاة الفجر..صحي عبدالرحمن وقال:ماني قادر أروح أصلي بالحرم تعبان ظهري حيل شلون بأركع وأسجد؟!
    اسمهان(على نياتها قالت):صلي وانت نايم!
    عبدالرحمن:بالله لاتفتين!ثقافتك الدينية خرطي!ويبي لك اعادة تأهيل!!بأحاول أصلي وأنا جالس!
    وقامت تصلي ماقدرت فـ صلت مع عبدالرحمن وهي جالسه!!
    بعد ماانتهوا من الصلاة التفت عبدالرحمن لها وقال:تخيلي لو عشنا لـ سن الشيخوخة وصار هذا حالنا؟!
    اسمهان:تكلم عن نفسك ياحبيبي إنت شيخوخ!!أنا بأظل بشيبوبتي لآخر يوم بعمري!!!
    عبدالرحمن:واش شيخوخ هذي بعد؟؟؟أخت شيبوب؟؟
    اسمهان:لا يافصيح!شيخوخ يعني شايب كبير..وشيبوبة يعني بأظل شابة على طول!!
    عبدالرحمن:لاحول ولاقوة الابالله!أما انتي عليك ثقافة يغار منها العدو ياشيخة !أنا من يوم ماقريت موضوعاتك عن الأباط والأكواع والركب السوداء وأنا غاسل إيدي منك!!!!
    اسمهان:الثقافة خليناها لك ياأبو تقوقع وتمحور وبوتقة!قال ثورة قلم قال!!
    عبدالرحمن:فديت الزعل واللي يزعلون!تراني أحب ألعب بأعصابك شوي!وعاجبتني مثل ماإنتي..ماأتمنى يجي يوم وتتثقفين فيه!!خلك على طبيعتك أحلى!!!
    اسمهان:طيب يادحوم!بكرة أتخرج من الثانوي وأحط الشهادة بعينك!!
    عبدالرحمن:ههههه لو العلم بالشهادات كان أنا أحسن الناس!مافي دورة ولادبلوم بالبلد إلا وأخذته...
    وجلسوا العريسين يتمازحون ويتضاحكون لين ماجاء موعد الفطور اتصل عبدالرحمن على المطعم وطلب منهم الفطور
    وقالوا له:عفواً بأي غرفة حضرتك؟؟
    عبدالرحمن:بغرفة المكسحين!!
    =====
    ههههههه صدق مكسحين واحد طايح من ظهره والثانية مربطة رجلها تقولون عجوز!!!
    فطروا العرسان وطقوها نومة لين الظهر....
    صحت اسمهان وحست نفسها بخير..بس عبدالرحمن مازال ظهره ثاير عليه!
    وقامت اسمهان تقلب بالكتيب الخاص بالفندق ولقيت انه النادي الصحي الملحق بالفندق يوفر جلسات مساج وتدليك..
    اسمهان:أنا أقترح عليك تروح للنادي الصحي الخاص بالفندق ترى مع التدليك أتوقع إنك بتتحسن
    عبدالرحمن:مافيني حيل أتحرك.
    وشلون تبيني أطلع من الغرفة على نقَّالة؟؟؟
    اسمهان:طيب نروح الحرم نصلي الظهر؟
    عبدالرحمن:ياليت بس شلون؟مو قادر أقوم؟
    اسمهان:عادي الدنيا سلف و دين أمس دفيتني على الكرسي المتحرك واليوم أنا بأدفك عليه!!
    عبدالرحمن:للأسف شكلي بأصلي في الفندق!
    اسمهان:ياسلام!الحرم جنب إذني و ساحته أشوفها من هنا وإنت تبيني أصلي في الفندق!!
    عبدالرحمن: وانتي يوم شفتي بنفسك عافية قمتي تتكبرين علي؟؟طيب والحل؟
    ماتشوفيني شلون مو قادر أركع ولاأسجد وظهري متصلب؟
    اسمهان:الحل إني أروح لحالي وأصلي بالحرم!
    عبدالرحمن:الله يقويك!بس بتعرفين تتصرفين لحالك؟؟
    اسمهان:وليش لا؟أنا قدها وقدود!
    وراحت اسمهان تتجهز وتتوضأ وأخذت مفتاح الغرفة وخرجت!
    ودخلت للحرم لين وقفت في ساحة الكعبة وصلَّت..وبعد ماانتهت قامت تمشي شوي وطلعت ونزلت ونزلت وطلعت تدور الباب اللي دخلت منه!ووصلت للمسعى وقامت تحوس تدور باب!
    وكل ماشافت مجموعة حريم مشت وراهم لعل وعسى يكونون طالعين من الحرم وتلحقهم!لكن ناس كانوا متوجهين للمسعى يكملون عمرتهم وناس رايحين فوق للسطح!وناس رايحين لدورات المياه!
    رجعت جلست في المكان اللي صلَّت فيه قدام الكعبة وقعدت تبكي!(ماودها تتصل بعبدالرحمن وتتفشل!+انه متكسر وطايح مابيقدر يجيها!!)
    وسمعتها أخت ملتزمة وهي تبكي وتنتفض من الخوف..
    الأخت الملتزمة:جديدة عهد بـ توبة؟
    ناظرتها اسمهان ولاردت عليها!
    الأخت الملتزمة:من نعم الرحمن عليك أن كتب لك عمر جديد تُكَفِرِين به عن ذنوبك الماضية!
    اسمهان:بس أنا ماأذنبت!
    الأخت الملتزمة:هذا حال الانسان يذنب الذنب ويغالط نفسه وهذا من تلبيس ابليس!مادمتي في بيت الله فاستغلي هذي الفرصة وتوبي إليه فلربما قبل توبتك!
    اسمهان(وهي تبكي):أتوب من إيش خليني بحالي!
    الأخت الملتزمة:أسمع في صوتك نبرة الندم ومادام رجعتي لله بالندم على مافات فبإذن الله مايخيب لك ظن..ولكن الزمي الاستغفار والدعاء..
    اسمهان:حرام عليك أنا مضيعة الباب!!
    الأخت الملتزمة:باب التوبة مفتوح مالم تغرغري!
    اسمهان(وهي مو فاهمة):أوعدك ماأغرغر!بس باب التوبة من أي صوب؟!
    الأخت الملتزمة:انضمي
    لمجموعتنا وانتي راح تفهمين كل ماأشكل عليك..وبإذن الله بتلاقين في كلامنا جواب لكل سؤال يجي ببالك رعاكِ الله....
    وقامت اسمهان معاها وراحت تمشي وخرجوا من عند الكعبة ودخلوا بالداخل ولقيت اسمهان مجموعة حريم جالسين ويقرأون قرآن..
    مسكت الأخت الملتزمة اسمهان من يدها وقالت للأخوات الثانيات تعرفهم بها:هذي تائبة جديدة إدعوا لها بالثبات!!
    الأخوات:نسأل الله أن يثبتك على طريق الحق ..
    وجلست الأخت الملتزمة وفتحت كتاب وقالت:الدرس الخامس!
    اسمهان:حسبي الله..أقول لك مضيعة الباب تجين تعطيني درس؟أنا صدق هبلة!بس مو لدرجة إنك تشرحين لي درس عن موقع الباب!تدرين؟بأروح أكتشف الموقع بنفسي!!قبل لايخانقني زوجي ويقول ليش تأخرتي!!!
    الأخت الملتزمة قامت تضحك لأنها توها تستوعب الموضوع!!!!
    الأخوات:خير ان شاء الله؟؟
    الأخت الملتزمة:انسوا الموضوع شكلي أنا اللي مضيعة!!
    ==========
    خرجت اسمهان أخيراً للساحة الخارجية وتعبت من الحر والشمس!الفنادق متشابهة وماعرفت لأي فندق تروح قامت تدور وكان فيه عجوز جالسة وحاطة قهوتها وتشرب ولاحظت إن اسمهان ضايعة..فنادتها..وقالت لها:اجلسي معي..
    ومن التعب جلست!
    صبت لها قهوة وقدمت لها تمر وقعدت تاكل...
    قالت العجوز وكانت ملقوفة شوي:شكلك مضيعة أهلك يابنية!
    اسمهان:لا أنا ماجيت مع هلي!
    العجوز:أجل من جيتي معه؟
    اسمهان:مع زوجي!
    العجوز:وينه زوجك؟ضيعتيه؟
    اسمهان:لا ماجاء معي!منسدح بالفندق!
    العجوز:مالت عليه من رجال يرسل زوجته تصلي وهو يتقلب تحت المكيفات!!
    اسمهان:اش أسوي فيه؟تعبان ومايقدر يقوم!
    العجوز:ياوجه الله!!مشلول؟؟
    اسمهان:لاااا يوووه بسم الله على زوجي!بس تعبان شوي!
    العجوز:ووين بزرانك؟
    اسمهان:ماخلفت بعد!
    العجوز:وماأعرس عليك بعد؟؟
    اسمهان:يووووه الله لايقَدِّر!!
    العجوز:وش يبي فيك؟عصلة مصلة وماتجيبين عيال؟!!!
    اسمهان:خذي قهوتك ماأبيها..إلا أنا وش اللي أبيه فيك عشان أقعد معاك؟!!!!
    وطبعاً عبدالرحمن يبي يتصل فيها ومو قادر الجوال بعيد وظهره يآلمه بشدة..
    قامت اسمهان تمشي عند الفنادق اللي مطلة على الحرم ودخلت في واحد منها واكتشفت انه مجمع تجاري وفيه أسواق وانشكحت من الفرحة وقالت بنفسها:واااااااو كشخة يااسمهان أول مرة في حياتك بتروحين السوق لحالك من غير مايغثك أحد!
    وصارت تتمشى ومحفظتها عامرة وش عليها؟وشافت محل أطفال ودخلت وجابت هدايا للمولود الجاي اللي ببطن أسماء وهدايا لبنات وعيال أخواتها وأخوها...
    ومرت من جنب محل يبيع بخور وعودة واشترت لأبوها صندوق فيه تولات عودة وبخور ومسبحة ولأمها
    صندوق فيه بخور ومستكة ومبخرة ومصحف..
    واشترت لسماح وابتسام عطورات وماكياج من محل ثاني..
    وهي مارة من جنب محل جلابيات قالت لنفسها:ليش ماآخذ لأم عبدالرحمن وحدة؟؟
    بس رجعت قالت لنفسها:أم عبدالرحمن مودرن شوي..يمكن مابتلبسها!!خل آخذ لها شوية أغراض للمطبخ!!
    واشترت لعبدالرحمن أشرطة محاضرات من محل التسجيلات..
    ويوم بغت تطلع من المول ماقدرت من كثر الأكياس وثقلها!!
    شافها حمَّال آسيوي وعرض خدماته وعطته الأكياس كلها وشالها وقال لها:فين روح ماما؟؟
    اسمهان:فندق.....
    الحمَّال:آه يئني فوق!
    وراح للأصانصير..واسمهان تقول بنفسها(آثاري هذا المول تابع للفندق وأنا مدري)!!!
    وهي طالعة بالأصانصير أذن العصر!
    ووصلت لغرفتها بالسلامة..
    وخلت الحمَّال يحط الأغراض كلها وقال ايش بتعطيه أجرة فتحت محفظتها مالقيت إلا 100 ريال خذتها بكل بساطة وعطتها اياه!!!
    وعبدالرحمن يراقبها من فوق السرير!!
    عبدالرحمن:مية ريال ياالظالمة لواحد شال لك الأغراض من فوق لتحت؟؟أجل لو راكبة معاه ليموزين لجدة كم بتدفعين؟؟
    اسمهان:ياشين البخل شيناه!مامعاي غيرهم وش تبيني أعطيه؟بومبة؟؟
    عبدالرحمن:وبالله توك جاية؟؟لك أكثر من ثلاث ساعات طالعة!كان رقدتي في الحرم أحسن!!ولا كان عدتي عمرة أمس أبرك!!
    اسمهان:عادي ليش معصب رحت وسعت صدري شوي ورجعت!!
    عبدالرحمن:أقص إيدي إن كنتي مابكيتي لين قلتي بس!وأكيد ضعتي وجمعتي عليك شرطة الحرم؟!!
    اسمهان:لااا مو لهاالدرجة جمعت حولي سواليف أحكي لك عنها بعدين!وترى بطني عصافيره تصوصو واش رايك نروح المطعم؟
    عبدالرحمن:وشلون ياحسرة؟
    اسمهان:وناسة!إذن بأروح المطعم لحالي!!
    عبدالرحمن:أشوفك أخذتيها لعبة تبين تروحين وتردين على كيفك؟؟أقول اجلسي مكانك ولا قومي صلي العصر أحسن!!
    في مدينة الرياض كانت عبير وأمها في بيت خالهم الكبير اللي عنده 3 أولاد متزوجين و4 بنات في البيت ..ثنتين بالجامعة ووحدة بسن عبير والصغيرة بالمتوسط..صحيح عبير كانت متأثرة وزعلانة من كل الأحداث السيئة اللي واجهتها بس بنفس الوقت لقيت ونس مع بنات خالها..
    وبيوم دار هالحوار بين عبير وأمها...
    عبير:يمه أنا أحس إني مبسوطة ببيت خالي بس ماتحسين إن جلستنا عندهم مخليتنا مثل العالة على صدورهم؟؟؟
    أم عبير:أكيد حِنا عالة وعلة على قلوبهم..بس كل هذا من أبوك حسبي الله عليه سحب اللي ورانا وقدامنا!لاذهب ولافلوس!
    عبير:ماعليك يمه..هذا لأنه زعلان مرة..كلها وقت ويهدى ويصير يصرف علينا..هذا أبوي وأعرفه كريم وقلبه طيب!
    أم عبير:ياليت يكون كلامك صحيح أخاف يتزوج وحدة وتلهف اللي وراه وقدامه!!
    ======================
    وجاء يوم السبت وراح عبدالرحمن لأول يوم بالدوام وكان شفت العمل مسائي بهذاك الأسبوع يبدأ من الظهر لين الساعة 11 بالليل...
    قامت اسمهان تنظف المطبخ وكانت أول مرة تطبخ فيها من يوم ماتزوجت والغداء كان عبارة عنبطاطس مجمد وقلته اسمهان بالزيت!
    نجت دجاج بالبقسماط وقلته اسمهان بالزيت!
    وكاتشاب طبعاً ماطبخته بس تعبت حالها شوي وحطته بصحن!!+صحن فواكه طبعاً مو هي اللي طابختهم بس غسلتهم وحطتهم بالصحن!!)
    وقبل مايروح عبدالرحمن الشغل وهم لسه يتغدون قالت اسمهان:اش رايك في طبخي؟عاد إنت اليوم محد قدك اسمهان طابخة لك بيدينها!!!
    عبدالرحمن:كل هالمقدمة على صحنين مقالي جاهزة؟؟أجل لو طابخة مفطَّح بتذلينا؟؟
    اسمهان:لا ياحبيبي...بس الكل يدري إن اسمهان مو حقت مطابخ!!
    عبدالرحمن:الله يعين!عموماً تسلم الأيادي!ولو إني أول مرة أشوف أحد يتغدى نجت وبطاطس!بس مع اسمهان كل شي جايز!!!
    ...وقام يتشطف ويتجهز للعمل...واسمهان ترفع السفرة وتنظف المطبخ......
    عبدالرحمن وهو رايح قال:ترى بأرجع الساعة 11 يعني عندك وقت طويل تقدرين تستغلينه وتكملين كل أشغالك..والعشا خليه ساندويتشات خفيفة!لأني بأروح العمل أتغدى مع الشباب!!
    اسمهان:ليش؟توك متغدي!
    عبدالرحمن:ههههه ليش الله يصلحك!تسمين هذا غداء؟؟هذا اسمه نقنقة مجبور!!
    وراح عمله..وقعدت اسمهان تفكر اش تسوي بغيابه..راحت تقلب في قنوات التلفزيون ومالقت شي يستاهل المتابعة!
    اتجهت للنت ولقيت مرام قاعدة على الماسنجر وتبادلوا السواليف المختلفة وقالت لها مرام:اتفقنا كلنا نزورك هذا الاثنين!
    ورحبت اسمهان بالفكرة ورجعت لمنتداها المفضل اللي تكتب فيه وغيرت قسمها وقالت لنفسها:ليش ماأدخل قسم الحياة الزوجية؟!!
    ويوم دخلت وتقلبت بين المواضيع خرجت وهي تقول بنفسها:توووووووووووووووبة!!إن زدت طبيت بهالقسم!!
    وش هالغثا اللي في النسوان؟مايكفي زوج الوحدة منهم كريه وغثيث معاها بالبيت...بعد تجي بالمنتديات وتسوي له دعايات؟!!!!!!!!!
    وفكرت لو تكتب موضوع تخاطب فيه عقلية النسوان اللي يحبون يكتبون عن يومياتهم اللي تبط الكبد مع أزواجهم!!وليتها ماكتبت!صلخوها النسوان بألسنتهم!!!
    طبعاً هالسمهونة تبي تسوي فيها ناصحة ومثقفة واستعانت ببعض الألفاظ اللي يستخدمها عبدالرحمن وكتبت الموضوع التالي بعنوان:
    (الشاردات إلى المنتديات!)
    الموضوع:إلى كل عضوة تمحورت حياتها حول نفسها وزوجها!ثم تقوقعت على نفسها لتنفجر لنا بعد دهر وتعلن لنا خروجها من البوتقة إلى عالم المنتديات لـ تفش غلها فينا! تكتبين لنا عن زوجك لماذا؟؟لـ تعلين قلوبنا به مثل ماعل قلبك؟؟
    أم لـ تخربين علينا أجواءنا الرومانسية مع أزواجنا؟؟
    أم لأنك لاتمتلكين موضوع مفيد فاتجهتي إلى زوجك لتجعليه قضية الموسم؟؟
    أم هي محاولة لتقليد الأخريات اللواتي يشتمون المجتمع ويسبونه كله ماعدا أنفسهم!فهم جميلات بشهادة الجميع! وقائمات بجميع حقوقهن الزوجية! ولايقصرون حتى مع أهالي أزواجهن! وبالرغم من ذلك تلاقي الصد والنفور من زوجها!
    عزيزتي( إذا أردتي الشردة من الواقع إلى الخيال فاشردي إلى أبعد بقعة في الخريطة!!فيومياتك الكئيبة مكانها ليس بالمنتديات!بالعربي إحنا عالم ندخل النت للفرفشة والوناسة وتحصيل الفايدة مو لضيقة الصدر وفقع المرارة!!)
    الحقيقة قطعتم قلبي بقصصكن أيتها العضوات مع تمنياتي في القريب العاجل أنا أرى منتديات ذكورية جديدة تمتلأ بشكاوي الأزواج من زوجاتهم!!!!
    وانتهت اسمهان من موضوعها وراحت أعزكم الله إلى دورة المياه..ودقايق ورجعت ولقيت عدد مشاهدات الموضوع 34 والردود 7!!
    اخترعت وقالت:صدق إنكم فاضيات!!
    وقرأت الرد الأول للعضوة(تطور بـ تهور):أي تمحور وتقوقع وبوتقة؟؟انتي حلي التشابك اللي عندك بعدين انصحينا!!
    الرد الثاني للعضوة(مصرقعة بس هادية):مين سمح لك أساساً تقرأين موضوعاتنا؟؟إذا مو عاجبك اطلعي برة المنتدى!
    الرد الثالث للعضوة(الدلع كله):مدام إنك تقدسين الرجال..ورى ماتفارقينا وتفتحين منتدى ذكوري وتحطين نفسك الزعيمة عليهم؟؟خل نشوف وش بتسطرون من ابداعات!!!!!!!
    الرد الرابع للعضوة(هبنقة ببندقة!!):إيه كلنا جميلات!انتي وش حارق رُزك؟؟ومانقصر مع أزواجنا بشي الله ياخذهم حتى أهالي أزواجنا اللي مايساوون بصلة حاطينهم على راسنا وخادمينهم بعيوننا الله يقلعهم
    يحق لنا نفضفض لبعض الوحدة فينا قمة في الرقة وقمة في الذوق والنعومة لكن زوجها مغمض عيونه عنها عسى عيونه البط!!!!
    قالت اسمهان بنفسها:وأنا أشهد إن فيك ذوق ونعومة ورقة تهز الصخر!!!!!!!!يكفي إن اسمك شاعري حيل!!!
    الرد الخامس للعضوة(رداة الحظ من حظي):أقص إيدي لو ماانتي رجَّال!!!ياعضوات تراها رجَّال متخفي بإسم حرمة!يامشرفات الغوا عضويتها!
    الرد السادس للعضوة(قاهرتهم برواقتي):ياأختي قاهرة نفسك ليه؟؟بكرة حتتجوزي وتعرفي الكلام اللي بنقولو اش معناتو!!
    الرد السابع للعضوة(دبدوبة النحيلة):وينك بس؟لو أشوفك لأبرك فوقك لين ماأقطع عنك الهواء!ياعدوة المرأة ونصيرة الرجل..مالك إلا القاز!!!!!!!!
    طبعاً اسمهان صار راسها يغلي من اللي قاعدة تقراه..وارتفع ضغطها وقالت:والله لو ماانتم غثيثات وكريهات ماكان أزواجكم يعاملونكم كذا!!إلا بالعكس رحمت أزواجكم الضعايف شلون متحملينكم!!يمين لو إني رجَّال كان صحت فيكم بعالي الصوت(كلــــــــــــكم طــــالق!)
    ========
    وقعدت اسمهان على هالحال من رد في رد وهي ترد على العضوات وهم يردون عليها لين ماوصل عدد الردود 51 رد ودخلت عضوة وقالت:شو قلة الأدب هاي؟ وينن أزواجكن عنكن؟سوء الخضار مابيصير فيه هيك حكي!!
    وجات العضوة اللي بعدها وقالت:أنا رأيي من رأي الأخت اللي فوق موضوع خسيس وردود أخس الحمدلله والشكر..بالله فضوها سيرة وكل وحدة منكم ترجع تتضارب مع زوجها أبرك!!!
    ردت اسمهان:تكفين لاتحشينهم على أزواجهم هذيل مهابيل ويسوونها!!بيروحون يتطاققون عشان يرجعون لنا بعد كم ساعة بمواضيع جديدة عن هوشاتهم!!
    دخلت مشرفة من مشرفات الموقع على الموضوع وقالت:نظراً لكثرة الردود الخارجة عن حدود الذوق سيتم حذف الموضوع!!
    زعلت اسمهان وقالت بنفسها:سبحان الله كلمة الحق صايرة تزَعِل هاالأيام!!!!
    قفلت النت وجلست تلعب بالألعاب اللي مخزنتها على اللاب توب...إلا وتليفون البيت يرن..
    اسمهان:آلو...مرحبا.
    شخص غريب:مرحبتين!
    اسمهان:مين تبي؟؟
    الشخص:أبيك انتي!
    اسمهان:آها أكيد انت حمود؟صح؟
    الشخص:فديت الذكاء!شلون عرفتيني؟؟
    اسمهان:أنا اسمهان والأجر على الله !ماتطوفني ألاعيبك مهما غيرت من صوتك!!
    الشخص:وياترى اش قاعدة تسوين؟؟
    اسمهان:أبد كنت قاعدة على النت بس زهقت!وعبدالرحمن اليوم مداوم!!
    الشخص:وش رايك أمر عليك وتطلعين معي؟؟
    اسمهان(وهي على نياتها):واااي وناسة تكون كسبت فيني أجر يامحمد!!
    الشخص:زين عطيني العنوان!!
    اسمهان:هاااااه؟؟؟
    الشخص:أقول عطيني العنوان يابعد عمري ماودك نطلع ونتونس مع بعض؟!!
    عاد اسمهان ذيك الساع استوعبت إنه واحد مغزلجي ومتصل يلعب!!
    وقفلت السماعة بوجهه..وجلست ندمانة على تسرعها في الرد عليه وقلبها يخبط ويرقع!!
    وصار التليفون يرن ويرن وكل شوي يرن....
    فجأة دق جوال اسمهان وراحت ترد إلا طلعت رانية..
    اسمهان:هلا رانية..
    رانية:هلا سوسو..أقول وش رايك تكسبين فيني أجر وتوفرين علي وتعطيني رقم الثابت أفضل؟؟؟
    عطتها اسمهان رقم التليفون الثابت..وأول ماصكت اسمهان الجوال إلا والتليفون يرن...
    راحت اسمهان تركض على بالها رانية إلا طلع الشخص المغازل!
    الشخص:هااه يااسمهان؟عبدالرحمن رجع ولا لا؟
    اسمهان:الله يصيبك ياشيخ قفل السماعة والا بيصير لك شي مايسرك!!!
    الشخص:يمه خرعتيني وأنا بعدي صغير!!!!خلاص ولايهمك ياحلوة بأقفل الخط بس أبيك تجاوبيني عن سؤال صغير ووعد أنسى رقمك طول العمر!!
    اسمهان:خير؟
    الشخص:انتي باقي تغنين مع أخوك فريد الأطرش ولا اعتزلتي؟ لأني من زمان مو سامع لكم شي جديد!!
    كاااااااااااااااااااااااك وجنبه أصوات شباب يضحكون!!
    قفلت اسمهان الخط وقعدت تبكي!
    إلا رانية داقة على جوالها..ردت اسمهان...
    رانية:وشفيك يالهبلة تقولين لي اتصلي وتشغلين الخط؟؟
    اسمهان(قامت تبكي):رنو الحقيني!!!!
    رانية:خير؟عبدالرحمن كفَّخك؟؟
    اسمهان:لاااااااا
    رانية:طيب وش صاير؟لاتقولين طلَّقك؟حرام عليك مابقى دخلنا بيتك وشفناه!وتطلقتي بسرعة؟؟
    اسمهان:وجع بعينك ان شاء الله!هذا كلام تقولينه؟لا تكفخت ولاتطلقت!بس فيه واحد نشبة بلاني باتصالاته على التليفون وأنا خايفة حيل!!!!
    رانية:وش منه خايفة؟بينط عليك من السماعة؟؟
    اسمهان:لااااا..بس قلت له إن اسمي اسمهان وزوجي عبدالرحمن!!
    رانية:طاح حظك ياالثولة طاح حظك!!وليش تعلمينه؟
    اسمهان:أنا قلت له من غير قصد!على بالي إنه أخوي محمد!
    رانية:وأخوك محمد مايعرف اسمك واسم زوجك يوم تروحين وتعلمينه؟ وش هالثوارة والبقارة اللي انتي فيها يبيلك شوية حشيش وعلف وترعين فيها!!!!
    اسمهان:لاتزيدين ناري الله يخليك!
    رانية:أقول انثبري جنب التليفون وبأحاول اتصل فيك لين مايمسك الخط..رقمي وتعرفينه ردي عليه..وإن دق هالمطفوق إياني وإياك تردين عليه..فاهمة؟؟
    اسمهان:فاهمة!
    واتصلت رانية وردت عليها اسمهان
    ودخلوا في سوالف من هنا وهناك..وبعدها......
    رانية:خلاص اتفقنا نجيك كلنا يوم الاثنين..مو تقولين دوام زوجك مسائي؟؟؟؟
    اسمهان:إلا..الله يحييكم
    رانية:بس ترى نجلاء أهلها وافقوا بعد جهد جهيد إنها تجي تزورك! على قولتهم انه موقفها حساس شوي بما انه أم عبدالرحمن خطبتها لولدها قبل!!
    اسمهان:غريبة وافقوا؟؟
    رانية:لأنها ياحلوة أقنعتهم انك ساكنة ببيت لحالك بعيد عن أم زوجك يعني مابتقابلها!!ولارجعت تصارحهم بالموضوع!!بس انتي بيجيك أحد غيرنا؟؟
    اسمهان:لا طبعاً مستحيل أنادي أحد!نبي نقعد ونتونس وننبسط لحالنا وبس!
    رانية:أشوى!!أنا قلت عسى ماتخبصينها وتسوينها جَمْعَة حريم وبزارين!!عاد أنا ياكرهي في سواليف النسوان كلها حمل وولادة وسب في الأزواج وأهاليهم!تقولين قاعدين في حراج!!!
    اسمهان:لا أعوذ بالله...هالطقة ماشفتها إلا بمنتديات النسوان!الله يكفينا شرهم على أرض الواقع!!
    =======
    المهم انتهت المكالمة واستلموا باقي الشلة اسمهان كل شوي وحدة متصلة...آخر وحدة أفنان..وبعد المقدمات الروتينية من سلام وأخبار...الخ
    أفنان:تصدقين يااسمهان؟بعد محاولات مستميتة أمي وافقت لي أزورك؟؟؟
    اسمهان:ليش عاد؟عبدالمجيد خطبك انتي الثانية وأنا ماأدري؟؟؟
    أفنان:لااااا بس خبرك بأمي مستحيل تخليني أروح مكان إلا بمرافقتها..وأنا بصراحة قلت لها ان هالجمعة جمعة بنات وبس وأهل اسمهان مو جايين فلا تجين معاي ياأمي بس مارضت!!وبعد المحاولات وافقت بس بشرط إنه خالتي مشاعل تجي معاي!!!
    اسمهان:مين خالتك مشاعل؟؟
    تقصدين اللي قعدت معانا على نفس الطاولةيوم زواج خالك اللي طاحت فيه رانية؟؟؟؟
    أفنان:بالضبط....ماشاء الله عليك ياسوسو مانسيتي؟؟
    اسمهان:وشلون أنساها؟إلا يازينها ويازين جلستها وكلامها.الله يحييكم كلكم وأنا بانتظاركم..
    =============
    وبعد ماانتهت اسمهان من مكالماتها الطويلة جاء عبدالرحمن من العمل وهو مرهق وسلم على اسمهان....
    عبدالرحمن:اش سويتي على العشا؟؟
    اسمهان:يووووووووووه نسيت!
    عبدالرحمن:ماشاء الله بدايات مبشرة بالخير فعلاً!!خلني أغير هدومي!
    دخل عبدالرحمن الغرفة يبدل وتفاجأ من منظر الغرفة!!
    عبدالرحمن:اسمهان..اللحاف ماتتطبق من يوم مارحت؟؟؟
    اسمهان:نسيته!كنت مشغولة!
    عبدالرحمن:لي 8 ساعات بره البيت مامداك تسوين عشا ولاتطبقين لحاف؟زين اتصلتي على أمي سلمتي عليها؟؟
    اسمهان:لا...ماجاء في بالي!!
    عبدالرحمن:أحلفِك..وش سويتي بهالثمانية ساعات؟؟؟
    قعدت اسمهان تحكي له عن سالفة المنتدى والموضوع اللي كتبته وردود العضوات..
    عبدالرحمن:لهذي الدرجة موضوعك سوى ضجة؟؟أخاف كاتبة موضوع سياسي؟!!!
    اسمهان:لا ياشيخ..موضوع عن الحياة الزوجية..بس مدري اشفيهم النسوان استخفوا!قلبوا الموضوع حلبة مصارعة!ومباراة ملاكمة!لين ماحذفته المشرفة وريحتني!!
    عبدالرحمن:الحمدلله إني ماقريته أخاف إنه من طقة مواضيعك السابقة!!!
    جاء اليوم الثاني وقامت اسمهان تطبخ ينقال بتسوي كبسة! وطلع الدجاج نص استواء والرز لاصق بقاع القدر ولاطعم ولازغم!! وشامز شمازة!
    اسمهان(قبل ماتذوق الأكل):
    هاه؟وش رايك اليوم بالطبخة؟
    عبدالرحمن:الحقيقة يابنت الناس ماعرفت قيمة أمي الا بعد ماأخذتك!!هههه وبعدين أول مرة بحياتي أشوف أحد يقدم الرز بالقدر حقه!!!الناس تغرف الرز بصحن كبير مو تجيب القدر على السفرة!!!
    اسمهان:وش أشوي الرز لاصق بقاع القدر؟قلت أجيبه وانت كد و كِل!
    عبدالرحمن:تدرين ان أخطر شي على صحة الانسان هو أكل اللحوم وهي نص استواء؟؟لأنها تصيب الواحد بعدة أمراض أهمها فيروس القطط!!
    اسمهان:وش دخل كلامك بأكلنا؟وبعدين فيروس القطط يجي من أكل القطط والحمدلله حِنا ماناكل قطط!!
    عبدالرحمن:ياعيني على الثقافة ياعيني!!حبيبتي بالله لاجيتي تقعدين على النت بغيابي بدل ماتكتبين موضوعات تشحنين فيها النسوان ويتلسنون عليك!أنا أقترح إنك تبحثين عن معلومات تفيدك بحياتك العامة وتثري ثقافتك!
    وقام عبدالرحمن يغسل يديه..
    اسمهان:مسرع!لسه ماأكلت غداك..وشفيك قمت؟؟
    عبدالرحمن(وهو يجامل): من حلاته..خفت أستسلم وأخلصه عليك!!
    قامت اسمهان تذوق طباخها وبغت تستفرغ من طعم الحرق اللي فيه والشمازة!!
    بدَّل عبدالرحمن هدومه وراح العمل..
    واتصلت أمها تتطمن عليها...وبعدها اتصلت أم عبدالرحمن وقالت لها:أنا بأروح اليوم عند أم حامد جارتنا اللي بالشارع المقابل تجين معاي؟؟
    اسمهان:لا ياخالتي عندي شغل بالبيت...
    وقامت ترتب البيت وتغسل الملابس وبالغلط كانت لابسة اسمهان على شعرها منديل أحمر وطاح بالغسالة وهي تحط ثياب عبدالرحمن!!وعلى أساس بتشيله ورن التليفون وراحت تركض تبي ترد و نست المنديل بالغسالة!!!
    إلا هي أختها أسماء وقعدت اسمهان معاها ساعة...
    ويوم راحت تخرج الغسيل إلا وهو في خبر كان بمبي ضارب في أحمر!!
    دخلت المنتدى ولقيت عضوة حاطة صور لملابسها وتاخذ رأي العضوات فيها!!والملابس كانت مو حلوة...والعضوات كاتبين واااو تهبل! واللي تقول ذوقك روعة!واللي تقول تقطعينها بالعافية! واللي تقول مرة نايس!!
    احترَّت اسمهان وقالت بنفسها:وعععععععع اشبه الذوق اختَّل عند الناس؟؟
    وألحَت اللقافة عليها ترد وكتبت: ياأختي قولي لي من وين تشترين ملابسك وأقول لك مين انتي؟؟
    حبيبتي حتى أبوعشرة تطور وصار اسمه توب تِن ويجيب صيدات!بس انتي ليش مغمضة؟؟والحلوات اللي يقولون يهبل ونايس..ليش تضحكون على بنت الناس؟؟تبونها تصير مسخرة!حبيبتي إذا انتي متزوجة قطيهم بالزبالة!وإذا بعدك بنية بعد قطيهم بالزبالة لأن نصيبك بيوقف لو أحد شافهم عليك!!!!
    ودخلت صاحبة الموضوع وردت:انتي وشفيك؟موب صاحية؟
    كل هذا غيرة؟؟قولي بسم الله ماشاء الله!كله حسد تبين تعرفين من وين شريتهم؟بس حريمتك موب قايلة لك!!!
    قالت اسمهان:قليعة في ذول النسوان وش هالثقة؟من وين يجيبونها؟يازين مجتمع البنات وأقسامهم بالمنتديات كلها خفة دم وفرفشة مو صراعات دموية!!أما الحريم شوية وتطلع لي الوحدة من الشاشة بساطور!!
    ========
    قعدت تفتش في أغراض عبدالرحمن ولقت دفتر كله أشعار وجلست تتسلى وتقراه...
    أخذت كلمات القصيدة وكتبتها على الكومبيوتر وقامت تسوي لها خلفيات وحركات بخبرتها المتواضعة بالفوتوشوب.......
    وكانت كلماتها:
    استفاق الكون من صرخة فؤادي
    بعد ماالكتمان فيه أضرم فتايل
    ماقوى عالبوح يهتــف أو ينادي
    صارت الأسرار هم وشغل شاغل
    الهوى فاضح لو انه يكون بادي
    وإن بقى بالقلب يفعل به فعايل
    ....الخ(انقطع الالهام ماعرفت أكملها!!
    المهم مر اليوم كئيب رتيب...لين ماجاء عبدالرحمن من العمل ودخل سلَّم على زوجته المصونة وشاف البيت مرتب وانبسط وشاف الغسيل منشور بغرفة الغسيل بالمطبخ وبغى ينجلط!!!
    عبدالرحمن:اسمهان اشفيها ثيابي حمراء؟؟لايكون غسلتيها مع قمصان نومك؟؟
    اسمهان:لا البندانة اللي على راسي طاحت بالغلط مع ثيابك!!
    عبدالرحمن:حرااام عليك هالثياب كلها جديدة مفصلهم قبل العرس ومكلفتني الشيء الفلاني!راحت كذا بغمضة عين؟!!
    اسمهان:ياخي لو تلبسهم مع شماغ أحمر بتطلع بمنتهى الذوق وتصير أحسن من العضوة الهبلة اللي ناشرة ملابسها عالنت تقول خروق سيارات!!!
    عبدالرحمن:آآآآه من النت ليتك بس تتعلمين من العضوات بعض السناعة!!
    =========
    .
    .
    .

    يتبع
    بإذن

    الله
     
    { فضلا .. أختي .. إن أعجبكِ الموضوع شاركيه مع صديقاتكِ }

    امل امولة و ام شهد معجبات بهذا.
  2. جاري تحميل الصفحة...

    مواضيع مشابهة في منتدى التاريخ
    رواية أسمهان وعبدالرحمن ( 22 ) شرفة القصص القصيرة والروايات ‏12 يناير 2016
    رواية أسمهان وعبدالرحمن (21 ) شرفة القصص القصيرة والروايات ‏12 يناير 2016
    رواية أسمهان وعبدالرحمن(الحلقة العشرون) شرفة القصص القصيرة والروايات ‏10 يناير 2016
    رواية أسمهان وعبدالرحمن(الحلقة التاسع عشر ) شرفة القصص القصيرة والروايات ‏10 يناير 2016
    رواية أسمهان وعبد الرحمن(الحلقة الخامسة عشر) شرفة القصص القصيرة والروايات ‏9 يناير 2016

  3. بسبوسة07

    بسبوسة07
    Expand Collapse
    تحلية جلسات
    المشرفات

    الإنضمام:
    ‏12 أوت 2015
    المشاركات:
    5,716
    الإعجابات المتلقاة:
    6,370
    نقاط الجائزة:
    7,200
    الإقامة:
    الأرض
    السن:
    25 إلى 30 سنة
    شكرا ام خالد الحبيبة الله لايحرمنا منك
     
    ام شهد و djalfawiya معجبات بهذا.
  4. djalfawiya
    1

    djalfawiya
    Expand Collapse
    عضوية ذهبية

    الإنضمام:
    ‏26 أكتوبر 2015
    المشاركات:
    1,224
    الإعجابات المتلقاة:
    1,677
    نقاط الجائزة:
    3,690
    الإقامة:
    الجزائر
    السن:
    30 إلى 35 سنة
    ولا يحرمني منك يا احلى بسبوسة
    جزيتي خيرا حبيبة لمرورك الطيب
     
    أعجبت بهذه المشاركة ام شهد
  5. ام شهد
    44

    ام شهد
    Expand Collapse
    سيدة أنيقة
    عضوية ألماسية

    الإنضمام:
    ‏19 يونيو 2015
    المشاركات:
    3,376
    الإعجابات المتلقاة:
    3,106
    نقاط الجائزة:
    7,190
    الإقامة:
    المسيلة
    السن:
    35 إلى 40 سنة
    شكرا لك
     
    أعجبت بهذه المشاركة djalfawiya
  6. djalfawiya
    1

    djalfawiya
    Expand Collapse
    عضوية ذهبية

    الإنضمام:
    ‏26 أكتوبر 2015
    المشاركات:
    1,224
    الإعجابات المتلقاة:
    1,677
    نقاط الجائزة:
    3,690
    الإقامة:
    الجزائر
    السن:
    30 إلى 35 سنة
    اهلا ام شهد
    مشكورة غلاتي على مرورك
     
    أعجبت بهذه المشاركة ام شهد
  7. امل امولة

    امل امولة
    Expand Collapse
    عضوية فضية

    الإنضمام:
    ‏6 يناير 2016
    المشاركات:
    596
    الإعجابات المتلقاة:
    700
    نقاط الجائزة:
    1,190
    الإقامة:
    الجزائر
    السن:
    25 إلى 30 سنة
    مشكووووووورة حبيبتي أنتضر جديد ااقصة
     
أختي .. فضلاً منكِـ ، إن أعجبكِ موضوعي قيميه من هنَا :
/5,