1. هذا الموقع يستخدم ملفات تعريف الارتباط (الكوكيز ). من خلال الاستمرار في استخدام هذا الموقع، فإنك توافق على استخدامنا لملفات تعريف الارتباط. تعرف على المزيد.
  2. لقاء وتواصل، مرحبا بكِ يا زائرة :

    لطلب الإستفسار والمساعدة، ضعي سؤالك: هنا. شروحات مهمة لمشاركات مميزة: هنا.
    تسجيل حضوركِ: هنا. إسألي عن أخواتكِ الغائبات: هنا. رسالة لأختكِ: هنا.
    شاركينا مشاعركِ: هنا. عبرّي عن شعوركِ: هنا. لماذا سجلتِ معنا: هنا.
    إستشارة المحتارة، هي زاويتك لطرح مشكلتك بكل أمان، تعرفي على طريقة طلب الإستشارة : من هنا.

  3. تنبيهات مهمة:

    المنتدى نسائي إسلامي، تمنع فيه الموسيقى وصور ذوات الأرواح في الرمزيات والمواضيع.
    لحماية صور مواضيعك من الضياع قومي برفعها على مركز رفع الصور الخاص بجلسات جزائرية بالضغط هنا.
    للتبليغ عن المشاركات المسيئة، يرجى إستخدام خاصية التبليغ بالضغط على أيقونة الموجودة أسفل كل مشاركة.
    حتى لا يحذف موضوعك الذي يحتوي على صور منقولة وعليها حقوق صاحباتها، يتوجب عليك ذكر مصدر النقل إجباريا.

هنا مجتمع نســائي فــاخر، واحة المرأة الجزائرية والعربية، وعالم نسائي متجدد ومتميز ينتظركِ. سجلي الآن وكوني معنا

رواية اسمهان وعبدالرحمن الحلقة (41 )

الموضوع في 'شرفة القصص القصيرة والروايات' بواسطة djalfawiya, بتاريخ ‏3 مارس 2016.

0/5, 0 أصوات

  1. djalfawiya
    1

    djalfawiya
    Expand Collapse
    عضوية ذهبية

    الإنضمام:
    ‏26 أكتوبر 2015
    المشاركات:
    1,224
    الإعجابات المتلقاة:
    1,677
    عدم الإعجابات المتلقاة:
    0
    نقاط الجائزة:
    3,690
    الإقامة:
    الجزائر
    السن:
    30 إلى 35 سنة
    اسمهان وعبدالرحمن
    الحلقة(41 )



    جزء اليوم (الزيارة)!!!
    صحيت اسمهان يوم الاثنين قبل صلاة الظهر واتصلت على جوال أختها ابتسام...
    ابتسام:هلا سمهونة هلا..الله الله عالاجتهاد!أشوفك صاحية بدري مو العادة!!!!
    اسمهان:اسمعي يابسومة اليوم بيزوروني صاحباتي وطالبتك طلب!
    ابتسام:من عيوني..أكيد تبيني أجيك وأساعدك عشان الضيوف!صح؟؟
    اسمهان:لا..مو صح!بغيتك تسوين لي صينيتين حلى من ايدينك الحلوة وترسلينها لي مع زوجك!
    ابتسام:يعني..أنا وأمي مو معزومين؟؟
    اسمهان:للأسف الشديد لا!ودي أقعد مع صاحباتي بـروحنا!!
    ابتسام:مين قدك؟شايفتنا مطعم وفاتحين طلبات توصيل؟عجيب أمرك!!
    اسمهان:عاد لاترديني...تكفين طلبتك!أنا لو أدري إن أسماء ماهي ملسونة وبتسمعني كلام يبط الكبد كان اتصلت عليها ووصيتها هي بعد تفزع لي بصوانيها!!
    ابتسام:لا حرام عليك كله ولاأسماء!لاتتعبينها ماعندها شغالة وهي على وشك ولادةمو فاضيتلك أبد!
    اسمهان:طيب أعتمد عليك في الحلى؟
    ابتسام:اعتمدي!وبأسوي لك أحلى كيكة توفي وصينية حلا طبقات الشوكليت ..حلو؟؟
    اسمهان:حلو ياحلو..وأنا عندي تمر وشوكولاتات ومعمول وغيره تكفي وزيادة..
    إلى نهاية المكالمة....
    واتصلت اسمهان على سماح وبعد السلام...
    اسمهان:تكفين سموحَة..
    صاحباتي بيزوروني اليوم وبغيت كم صنف مالح من ايدينك الحلوة؟وش قلتي؟
    سماح:غالية والطلب رخيص..بس زين إنك كلمتيني من بدري لأني رايحة لأختي هند اليوم عندها جمعة حريم..
    اسمهان:خلاص ومتى بترسلين لي الأصناف؟؟
    سماح:خليها مع طلعتي من البيت مرة وحدة..بعد المغرب!
    اسمهان:وهو كذلك...
    وشوي واتصل عبدالرحمن...
    عبدالرحمن:صباح الظهر ياسمهونتي!غريبة صاحية بهاالحزة؟؟
    اسمهان:مو قلت لك من أمس إن صاحباتي جايين؟؟
    عبدالرحمن:طيب تبيني أجيب معاي شي تقدمينه لضيوفك؟؟
    اسمهان:لا الله يعطيك العافية مايحتاج...ابتسام وسماح مابيقصرون...
    عبدالرحمن:ماشاء الله..أهلك بعد جايين؟؟
    اسمهان:لاياشيخ..ماعزمتهم أصلاً بس دقيت على ابتسام وسماح يسوون لي أصناف ويرسلونها!!!!!
    عبدالرحمن:الله يصلحك يااسمهان بالله هذا كلام؟؟ليش بيتنا فاضي مافيه أكل يوم تروحين تشحذين من أهلك؟؟ولا شايفتنا عاجزين نجيب شي لضيوفنا؟؟
    اسمهان(بدلع):يوووه دحومي!لاتكبرها عاد وهي صغيرة!المسألة فزعة لي!أول مرة بأستقبل ضيوف وماودي أخبص بالمطبخ!!
    عبدالرحمن:بس ماهي حلوة منك تطلبينهم أطباق ولاتنادينهم لبيتك؟الله يهديك بس!على العموم وش طابخة على الغداء ان شاء الله؟؟
    اسمهان:ياسلاااااام أقول لك بيجيني ضيوف..تقول لي وش بتطبخين على الغداء؟؟
    عبدالرحمن:وش دخَّل هذي بذيك؟الضيوف بيجونك بالليل صح؟
    اسمهان:ايه..بس أنا ماأبي أقربع المطبخ بأروح ذحين وأرتب البيت وأغسل الحمامات وأضبط الغرف كلها..تدري أول مرة بيدخلون بيتي لازم أفرجهم عليه وهو قمة في الترتيب!
    عبدالرحمن:ماشاء الله ياليتني ضيف!!
    اسمهان:وش تقصد؟؟
    عبدالرحمن:لا ولاشي!! بأرجع عقب صلاة الظهر ومعاي غداء من بره!مع السلامة..
    وبدأت اسمهان تطبق الغسيل المنشور من أمس وترتب وتنظف وبعد الصلاة بـ وقت جاء عبدالرحمن ومعاه الغداء وشوي أغراض..
    فتحت اسمهان الأكياس لقيت عبدالرحمن شاري صحن كبير ورق عنب+صحن كبير بقلاوة..
    اسمهان:ليش جايب ورق عنب وبقلاوة دحومتي؟؟
    عبدالرحمن:عشان تقدمينهم لضيوفك مع باقي الأكل..
    اسمهان:شكرااااا..
    وحطت الغداء وكان عبارة عن مشاوي على الفحم +رز وسلطة..بعد الغداء..استعد عبدالرحمن للروحة إلى العمل...
    وودعته اسمهان وهي طايرة من الفرح لأنها بتستقبل صاحباتها بعد عدة ساعات!!
    نزل عبدالرحمن يسلم على أمه وقال لها:اش رايك يمه تطلعين لاسمهان اليوم؟بيجيها ضيوف!
    أم عبدالرحمن:الله يرضى عليك ياولدي كأنك داري عن زهقي ومللي من قعدة البيت!خلاص بأطلع لها بعد المغرب ان شاء الله.
    وبالفعل استكملت سمهونة شغلها وفي العصر أخذت دش..وبدأت تجهز أغراض القهوة والشاي من مكسرات وشوكولاتات وخلافه....
    وقبل المغرب بدأت تتزبرق وتتحومر وتتصوفر!(لغير الناطقات بالعربيةيعني تحط أحمر وأصفر وكل ألوان الطيف!!)وتضبط الشعر...
    وأذن المغرب وراحت تصلي إلا ودق الجرس وكانت كاتيا شغالة أهل اسمهان على الباب ومعاها صواني الحلا أخذتها اسمهان وشكرتها وراحت الشغالة...
    وكانت الأصناف اللي سوتها ابتسام(سينابون+خلية النحل+حلى طبقات الشوكليت+كيكة التوفي) قالت اسمهان بقلبها :الله يسعدك يابسومتي على تعبك...
    ودق الجرس مرة ثانية..قالت اسمهان بنفسها:حسبي الله عليكم من ضيوف باقي مابخرت البيت!!لايكون هذي رانية المطفوقة؟!!!!!!
    ويوم فتحت الباب تفاجئت بشوفة أم عبدالرحمن!!!
    اسمهان(بدهشة):خـــــــالتي؟؟؟
    أم عبدالرحمن:ايه..ممكن أدخل ولا وقفتي بتطول عند الباب؟؟
    اسمهان:حياك حياك..تفضلي!
    أم عبدالرحمن:الصراحة بتكسبون فيني أجر اليوم الزهق كان ماخذني..لولا إن عبدالرحمن جاء بالوقت المناسب وعزمني وقال انه عندك ضيوف!!
    اسمهان بداخلها قالت:أما هالعبدالرحمن يبيله زنط!!هلي وهم هلي ماعزمتهم عشان أستفرد بضيوفي!تقوم تنادي لي أمك؟؟عَز الله خربت!!
    وراحت اسمهان تبخر بيتها..وشوي ودق الجرس..إلا طلعت رانية جاية بطيرانها!!
    فتحت لها اسمهان وقامت رانية تحضنها بقوة... وتقول:واحشتني حيـــــــــل ياالسوسة!
    اسمهان:مايوحشك غالي ياقلبي.
    فسخت رانية عباتها ومشطت شعرها قدام مراية المدخل..وجايبة معاها تورتة كبييرة بالفانيلا والفراولة....
    ومسكت الطيران وقامت تطق وتغني: ونحمد الله يوم لقانا تم
    و انزاح عن قلبي وقلبك الهم
    اسمهان:اسكتي يالهبلة اسكتي..أم زوجي داخل..
    رانية:وش جابها؟تبيني أشق الطار فوق راسك؟ وتكذبين علي وتقولين مابأنادي أحد إحنا وبس! أخاف منادية جوهرة بعد؟؟
    اسمهان:ارخي صوتك..ماناديت أحد حتى أنا تفاجئت بجيتها بس كله من عبدالرحمن هو اللي عزمها!!
    دخلت رانية تسلم على أم عبدالرحمن..وجلست معاها..
    وجلست اسمهان وتكلموا شوي وعرَّفت اسمهان أم زوجها بصاحبتها رانية...وشوي ودق الباب إلا هي أفنان وخالتها مشاعل(وجايبة أفنان معاها هدية عبارة عن مصحف كبير وحامل خشب محفور) وسلموا على اسمهان ودخلوا المجلس عند رانية وأم عبدالرحمن...
    وثواني وجات مرام ومعاها باقة ورد كبيرة وبعد ماحطت عباتها ومشطت شعرها دخلت وسلمت على الحضور ووراها على طول جات نجلاء ومعاها سلة فيها تحف وشمعدانات ومغلفة بطريقة أنيقة..ودخلت المجلس...دارت عليهم اسمهان بالعصير..
    وبدأت أم عبدالرحمن تتعرف على الضيوف وقالت:مانسيتكم انتم لابسات الوردي صح؟؟
    الشلة:صح!!
    واستغربت أم عبدالرحمن إن مشاعل خالة أفنان هي الوحيدة الكبيرة بينهم وكان عمرها 26 سنة!
    فقالت لأفنان ومشاعل:ماشاء الله إنتم خوات؟؟
    أفنان:لا..هذي خالتي أخت أمي..
    أم عبدالرحمن:انتي متخرجة يابنتي؟؟
    مشاعل:ايه من 4سنوات تقريباً..
    أم عبدالرحمن:موظفة؟
    مشاعل:ايه أشتغل بمعهد الأمل.
    أم عبدالرحمن:تقصدين معهد الأمل الخاص بالصم والبكم؟؟
    مشاعل:ايه تعرفينه؟؟
    أم عبدالرحمن:ايه ولدي وهو صغير كان يدرس فيه...
    مشاعل:الله يشفيه يارب...اصابته وراثية؟؟
    أم عبدالرحمن:لا ياحبيبتي..مافي أحد بعيلتنا كلها أصم وأخرس غيره..بس بعيد عن السامعين أول ماولدته تعرض لالتهاب بالأذن الوسطى وسوى له مضاعفات مع الوقت لين مافقد حاسة السمع بالتدريج..وبالتالي ماصار عنده قدرة على النطق لأنه مايسمع..
    مشاعل:طيب كم عمره هالحين؟
    أم عبدالرحمن:28 سنة..
    مشاعل:وشلون تتواصلون معاه؟
    أم عبدالرحمن:من يوم هو صغير دخلناه معهد الصم والبكم وكنا نرسل أخوانه معاه عشان يتعلمون لغة الاشارة..ولما كانوا يرجعون البيت يعلموني اللي تعلموه وصرت أفهم عليه..وهو ماشاء الله عليه ذكي يقرأ كلام الشفاه..وتعابير الوجه...
    مشاعل:طيب وهل تحسين اعاقته السمعية سبب في تعطيل فرص اندماجه بالمجتمع؟؟
    أم عبدالرحمن:لا بالعكس..بسم الله عليه من يوم وهو صغير وهو اجتماعي ويحب الأطفال ويوم كبر توظف بمركز خاص بالاعاقات السمعية ومشاكل النطق وعنده صداقات كثيرة أغلب الوقت وهو بره..
    مشاعل:ماشاء الله أنا لاحظت عندنا بالمركز إنه أغلب الأشخاص اللي يكون عندهم اعاقة يكون بنفس الوقت عندهم جانب ابداعي وموهبة بمختلف المجالات وهذا شيء رائع يخليهم يثبتون وجودهم بالمجتمع...
    أم عبدالرحمن:صادقة يابنتي..هو يعشق الرسم كثير لو أطاوعه ماسلم منه جدار في البيت!خليته بس يرسم على جدار غرفته..وعلى جدار واحد من مجلس الرجال..
    اسمهان:بالله ياخالتي الرسمة اللي على جدار مجلس الرجال رسم يده؟؟؟رووووعة ماشاء الله عليه فناااااان!!
    مشاعل:طيب ياخالة هل تفهمين كل اللي يبيه بلغة الاشارة؟؟
    أم عبدالرحمن:الصراحة لما يكون معصب وعنده كلام كثير أحس اني ماأفهم عليه كثير..عشان كذا من يوم وهو صغير وأنا حاطة بالصالة سبورة فلوماستر على حامل كل ماعجزت أفهم منه شي أقول له اكتب اللي بداخلك ويكتب لي مسيكين..
    اسمهان:تصدقين ياخالة انتبهت لهاالسبورة واستغربت وجودها وبعدين عبدالرحمن قال لي:انه عبدالمجيد يكتب عليها أحياناً اللي يبيه من أمي...
    مشاعل:اعذريني ياخالة على كثر أسئلتي بس حالياً أنا مشغولة بتحضير بحث عن فئة الصم والبكم وأول مرة تمر علي حالة بعمر ولدك لأن أغلب الحالات اللي عندنا بالمعهد دون سن العشرين..
    أم عبدالرحمن:لايابنتي ماضايقتيني ولاشي..إلا خليتيني أفضفض..عن صدري..يكسر خاطري لاشفته..كل اللي بعمره تزوجوا إلا هو مالقى من ترضى به!
    مشاعل:ان شاء الله يلقى بنت الحلال اللي تناسبه..كثير مر علي حالات مثله وتزوجوا وعاشوا حياتهم..أنا زميلتي طبيعية ومتزوجة واحد أخرس وعايشة أحسن حياة..
    في هذه اللحظة تضايقت نجلاء من الكلام وقامت!!!
    وشوي ودق الجرس وكانت سماح على الباب..سلمت وجايبة معاها سلة الرحلات ومعبيتها فطاير ومعجنات وفتوش وكفتة بطاطس!
    شكرتها اسمهان من القلب...
    سماح:أفا يالعلم!كل همك بالسلة وبس؟مابتقولين لي تفضلي؟؟
    اسمهان:الله يحييك..مادام أم عبدالرحمن عندنا فالدعوة صايرة بحري!!تفضلي..
    دخلت سماح وهي مستغربة من هبال اسمهان!!!
    وكانت نجلاء واقفة بالمطبخ قالت نجلاء:اش رايك يااسمهان مادام الأكل عندك كثير مرة ليه ماتسوينه على هيئة بوفيه واللي يبي شي يغرف؟؟
    اسمهان:والله فكرة بس شلون؟
    نجلاء:طاولة السفرة اللي برة نشيل التحف اللي عليها ونرتب عليها كل الصحون الحالي والمالح ونحط القهوة والشاي على جنب وكل وحدة تاخذ اللي تبيه!
    وبالفعل اشتغلوا الثنتين يرتبون ويجهزون السفرة...

    وجهزوا نجلاء واسمهان السفرة ونادوا الجماعة وجلسوا ياكلون وأم عبدالرحمن وسماح يتبادلون السواليف..
    أم عبدالرحمن:مرة زعلت على اللي صار لتركي ياسماح شلونه هو الحين؟؟
    سماح:ماشي حاله..
    أم عبدالرحمن:الله يعوض عليه..اللي صار له مو شي بسيط
    سماح:ماعليك الرِجال ينسون جروحهم بسرعة مو مثلنا حِناالحريم!!
    وساد الصمت على طاولة السفرة وصارت رانية تناظر اسمهان وتغمز!(يعني اش السالفة!!)
    دق جوال سماح إلا طلع محمد يستعجلها تنزل عشان يوديها لبيت أختها هند وكانت سماح جالسة من الأول بعبايتها..واستأذنت الضيوف وراحت.....
    أم عبدالرحمن:ماشاء الله بملكة اسمهان كانت تسريحاتكم ومكياجكم مرة حلوة وين تضبطتوا؟
    مرام:بصالون أختي ماجدة...
    أم عبدالرحمن:ماشاء الله عندها صالون؟طيب اش اسمه؟ووين موقعه؟؟
    مرام:اسمه..؟..(ماأبغى أقول اسمه أخاف تفشلوني وتروح ألف وحدة منكم وتقول أنا من طرف رماح ردينية ويصلحونكم على حسابي!!)وموقعه بحي الخالدية...
    أم عبدالرحمن:خلاص أنا وجوهرة بنتقاول معاكم بدل مانروح لمشاغل يأخرونا ويصبغون وجوهنا أشكال وألوان!!
    مرام:المشغل وصاحباته تحت أمرك خالتي...
    أم عبدالرحمن:يسلم لي ذوقك يالغالية..وهالحين استأذنكم ودي أرجع لبيتي..أكمل أموري..
    اسمهان:لسه بدري ياخالتي!!
    أم عبدالرحمن:بدري من عمرك حبيبتي..والله يعطيك العافية ويكثر خيركم ان شاء الله..ماشاء الله عليك فنانة وسفرتك حلوة ماعليها قصور!تسلم أياديك..
    اسمهان(بخجل):الله يسلمك ياخالتي!.
    وقامت أم عبدالرحمن بتطلع وطيبتها اسمهان بتولة عود حاطتها على المدخل..
    أم عبدالرحمن:طاب طيبك..وعاش حبيبك!!
    وخرجت من البيت...وصكت الباب وراها...
    إلا رانية قامت تطق على الطاولة وتغني:شيلوها شيلة..والليلة ليلة!
    نجلاء(وهي تتريق وتقلد صوت أم عبدالرحمن):ماشاء الله عليك فنانة وسفرتك حلوة ماعليها قصور!تسلم الأيادي!
    قامت مرام ترد عليها(وهي تقلد اسمهان):الله يسلمك ياخالتي!
    مشاعل والشلة:هههههههه
    نجلاء:يقطع أبو البكش ياشيخة!ماكأني ساعدتك في ترتيب السفرة وشفت سماح داخلة بأكلها وباقي الصحون يا مغلفه بنايلون يا مغلفة بقصدير..يعني من عند أهلك أكيد!!!
    أفنان:أفاااااا..معونات خارجية؟!يامال الفلس!!
    اسمهان:بسكم عاد..أهم شي إن الأكل لذيذ واستانستوا عليه!
    رانية:من ناحية لذيذ..فهو لذيذ...ماتشوفيني منطمة وساكتة؟ من كثر مامليت فمي!
    بس بصراحة ياحظك بأم عبدالرحمن!حرمة كشخة وذوق اللي يشوفها مايقول كبيرة!حسرة على عجايزنا الوحدة قَشْرة من برة ومن جوه!!!!!
    اسمهان:ترى خالتي موب كبيرة عمرها مايتجاوز ال46 سنة..بس تزوجت وهي صغيرة..
    مرام:بسرررررررعة جيبي صور الزواج!
    وراحت اسمهان تجيبها وتفرجوا عليها...وبس شافوا عبدالرحمن من غير شنب ولحية فقعوها ضحك!
    الشلة وهم متجمعين على الألبوم:كااااااااااااااااااااا اااااااك..
    نجلاء:تضحكين علينا وتقولين متزوجة سعودي؟؟أقول طلَّع الجنسية ولا بعد؟؟؟ههههه
    رانية:ماشاء الله وجهه يبرق!مايندرى مين اسمهان من عبدالرحمن!!!!هههههه
    مشاعل:حرام عليكم أكيد شايف نفسه كشخة!حطمتوا اسمهان!!
    مرام:اسمهان صديقتي وأعرفها زين..لابدها حلفت عليه يخرب شكله عشان لاتصيده عين!!هههه
    اسمهان:بلا يبلاكم !هذا صديقه لعب عليه واتفق مع الحلاق يحوسه!!
    رانية:والله فلَّة زوجك..طلع حتى هو عنده أصحاب راعيين مقالب؟!عسى مو مسميين نفسهم شلة الصاعقة بعد؟!!ههههه
    نجلاء:لحظة ياجماعة مالاحظتوا كلام أم عبدالرحمن مع سماح؟؟
    الشلة:ايه لاحظنا!
    رانية:ايه صحيح يااسمهان اش السالفة؟؟ماأسمع إلا كلمة الله يعوض عليه!!!لايكون عبير ماتت؟؟
    اسمهان:لا الشر بره وبعيد..بس تطلقت!!
    شهقوا الشلة بصوت جماعي!!
    اسمهان:بسم الله عليكم!يعني اللي يشوفكم..يقول مساكين ماوصلتكم الأخبار!!
    الشلة:فعلاً ماوصلتنا ولاندري!!
    قامت اسمهان تحكي لهم بالتفصيل سالفة الحرق والسحر والسلب والنهب واستغلال تركي!
    أفنان:يالطيف يارب..ياويلهم من الله وش ذنبه ولد الناس يلعبون عليه؟؟
    مشاعل:أشك إني قاعدة أسمع رواية لفجر السعيد!!!
    رانية:هي صدق إن البنت ذي متشربة الخباثة لدرجة الثمالة!بس ماتوقعتها تطورت لهالدرجة الإبليسية!!!
    اسمهان:وشفيك تتكلمين مثل العضوات اللي يبون يسوون نفسهم مثقفات بالغصب؟!!
    نجلاء:ضيقتي صدري بسيرتها!خلاص لاتجيبون طاريها..أهم شي افتكينا منها ومابنشوفها السنة الجاية!!
    مرام:حكينا ياسمهونة عن شهر العسل ورحلتك لدبي وماليزيا!!
    وقامت اسمهان تحكي لهم عن كل شي ومواقفها الطريفة حتى بـ مكة!
    الشلة:ههههههههههه
    رانية:الله يقطع ابليسك ياسوسو تدلكين رجيلاتك بوسط الحرم؟صدق ماتستحين؟!!
    نجلاء:أقول زين طاح حظك بأندونيسية تمسج..مو ايرانية كان دهنت سيقانك بـ تفالها!!
    وطاحوا بسمهونة تريقة ومزح...
    وقالت مرام:ها ياعسل بتفرجينا على بيتك ولا نسوي هجوم ورحلة استكشافية؟؟
    اسمهان:لاتفضلوا أنا مخططة أفرجكم...

    دخلوا مكتب عبدالرحمن..وقامت رانية تفتش بالكتب وقالت:شوف وجه العنز وإحلب لبن!!طالعوا أسماء الكتب بس ترفع الضغط وتلوع الكبد!!
    ثورة في اكتشافات نووية!
    ارهاصات تاريخية..مع وقفة مشرفة!
    تاريخ الأدب من زبدة الحقب!
    فتش عن الشخصية المغناطيسية
    النظام على الطريقة الأفلاطونية
    اسمهان:فعلاً توجهات عبدالرحمن في القراءة والكتابة جايبت لي الضغط!
    نجلاء:رجَّال وبيتجاوز الثلاثين..وش تبينه يكتب عن آخر صيحات الفساتين والمكياج؟ولا عن خلطات التبييض والتفتيح؟؟
    ودخلوا غرفة النوم وراحت رانية الملقوفة تركض على دولاب اسمهان وفتحته..وقالت:إلى الباحثات عن الكشخة!طبوا وتخيروا!!
    نجلاء:ياواد يااسمهان ياحركات!اش هالترتيب والتنظيم كله؟؟
    رانية:بنات تعالوا نشم ريحة ملابسها أخاف معلقتهم ومو غاسلتهم!!
    اسمهان:ياشين اللقافة ياناس!وخري أشوف!
    فتحت رانية دولاب عبدالرحمن ولقيت الثياب الحمراء اللي خربتهم اسمهان معلقة!!
    رانية:ياويلي ويلاه الرَجَّال انهبل!حلق شواربه ولحيته وصار يلبس أحمر!!
    الشلة:هههههههههههههه
    المهم كان انطباع الجميع عن البيت والأثاث زين..طبعاً كل شي كان كشخة وذوق..

    بعد ماانتهوا الشلة من جولتهم في بيت اسمهان دعوا لها بالبركة وعجبهم الأثاث والتنسيق..
    مشاعل:بيتك مرتب وحلو يااسمهان ماشاء الله ..الله يهنيك فيه..
    رانية:يسمونه القفص الذهبي مدري ليش!مع انه مافيه شيٍ يبرق!!
    مرام:ويقولون عش الزوجية وماني شايفة بيض!!واسمهان ماتطير!
    نجلاء:ههههه..أقول تعالوا نرفع الأكل من طاولة السفرة...
    رانية:شمروا أكمامكم يابنيات وخربوا كشختكم شوي وخل نساعد اسمهان بغسل الصحون وتنظيف المطبخ!
    اسمهان:والله ماتمسكون شي!خالتي واعدتني ترسل شغالتها ترَّفع معاي...
    وثواني ودق الجرس إلا هي شغالة أم عبدالرحمن ودخلت المطبخ وبدأت التنظيف..
    اجتمعوا الشلة بالصالة وقامت رانية توزع الطيران وعددها 3 دفوف عطت واحد لاسمهان وواحد لمرام والثالث قالت رانية لمشاعل:مشاعل تعرفين تطقين؟
    مشاعل:أفا عليك..أعرف أطق وأكفخ بعد!!
    رانية:يالله طقوا..حانَ وقت الفلَّة ياأظرف شِلة!!!
    وقاموا يطقون وسحبت رانية نجلاء وقامت ترقص معاها وحطت رانية شيلة على راسها وقامت تغطرف وترقص وماخلت رقصة مارقصتها!جمعت كل ثقافات الشعوب برقصها رقص عراقي على عماني على سامري على فرعوني!!على سامبا وفلامينجو!!حتى باليه نطنطت لهم شوي وقامت ترقص باليه على طق الدفوف!!!!ههههه
    وسط ضحكات الشلة!!
    التفتت مشاعل خالة أفنان وقالت لأفنان:أما شلتك هذي يافنون شي ماحصل!!!
    وسحبوا أفنان ترقص معاهم ورجعوا سحبوا اسمهان ودبكوا ورقصوا ورانية عاد تخبرونها كل مادبكت برجلها على الأرض سوت زلزال بالعمارة!!
    وأم عبدالرحمن قاعدة بصالتها تحت تتابع برنامج وكل شوي تطالع للسقف وتقول:ياساتر يارب وش هاالرفيس؟؟؟
    وشغالة أم عبدالرحمن واقفة بالمطبخ تشتغل وتتابعهم من بعيد وتقول بنفسها:مدام اسمهان وهادا ديوف واجد مجنون!!!!!!!!!
    ولبسوا رانية ونجلاء على رووسهم طِرَح وقاموا يسوون نفسهم عجايز ومسكوا اسمهان بيديها وقامت رانية تقول:لاأوصيك يابنتي يااسمهان لاصفقك زوجك على خد عطيه خدك الثاني!!
    نجلاء:ايه فديتك ولا ضربك زوجك بـ يد اضربيه بإيدك الثانية!
    رانية:وأن مد لسانه عليك شبر..مدي لسانك شبرين!!
    نجلاء:وإن قال لك يمين قولي يسار وإن قال لك فوق قولي تحت!
    رانية:وخلك نشمية وشاطرة إن قمتي لاتقعدين وإن قعدتي لاتقومين!!
    أفنان:ياحليلكم ياعجايز الجن!بتخربون بيت البنت!
    اسمهان:هههه..كأني عاد بأسمع شي من كلام هالمهابيل الله يخلي أمي وخالتي نوال نصايحهم من ذهب...
    وقضوا الزيارة بتنكيت ووناسة..وشوي وراحت أفنان وخالتها..وبعدهم راحت نجلاء..وبعدها راحت رانية..وآخر وحدة خرجت كانت مرام ونازلة من الدرج وماغطت وجهها لسه وسواقها وشغالتها ينتظرون برة بهالوقت كان عبدالرحيم أخو عبدالرحمن توه واصل من السفر ومسوي مفاجأة لأمه وماخبرها..ويوم شاف السيارة اللي فيها سواق وشغالة ظن إن أمه عندها ضيوف فقام يلف بالحوش بانتظار يخرجون الضيوف من عند أمه..وهو واقف كانت مرام نازلة من الدرج وماهي منتبهة له أما هو تسمرت عينه عليها وفجأة جات عينها بعينه فارتبكت البنت وغطت وجهها وراحت للبوابة بسرعة وركبت سيارتها!!!أما هو من الاحراج لف وجهه بسرعة وراح يدق الباب الرئيسي وفتحت له أمه...
    أم عبدالرحمن:هلا عبدالرحيم..ياحيا الله من جانا!!ادخل ادخل..وقامت تسلم عليه..
    أم عبدالرحمن:وش هالمفاجأة الحلوة؟لاخبرتني بحضورك ولاشي!
    عبدالرحيم:ماصدقت انهم عطوني اجازة قلت إلا أجي وأقضيها معاكم..وجايب لك أخبار حلوة معي!!
    أم عبدالرحمن:بشرني..هات!!
    عبدالرحيم:أخيراً وافقوا بالعمل على طلب النقل اللي صار لي سنين مقدم عليه..وبينقلوني من محطة أرامكو اللي بأبقيق..هنا عندكم بجدة!!
    أم عبدالرحمن:صحيح؟؟؟؟الله يسعد أيامك ويبشرك بالخير ياولدي قول آمين!!
    وقامت أم عبدالرحمن تدمع عيونها
    عبدالرحيم:وش فيك يمه؟ظنيت هالخبر بيسعدك مو يخليك تبكين!
    أم عبدالرحمن:أبكي من فرحي!ماتتخيل ياولدي كم صار لي أدعي إنكم تتجمعون حولي وماتفارقوني أبد..وهذا أخوك عبدالمجيد صار له مدة من يوم نقل جدة وصار ساكن معي..وأختك أحلام كلها شهر بالكثير وبتسكن مع زوجها بجدة!وعبدالرحمن الله يحفظه هو الوحيد اللي ماابتعد عني منكم الحمدلله على كل نعمة..عسانا مجتمعين على الخير دايماً..
    عبدالرحيم:يمه بغيت أسألك سؤال؟
    أم عبدالرحمن:اسأل!
    عبدالرحيم:شفت سيارة واقفة بره فيها سواق وشغالة..منهي سيارته؟؟
    أم عبدالرحمن:أكيد سيارة وحدة من ضيوف اسمهان زوجة أخوك..
    عبدالرحيم:أهلها كانوا عندها؟؟
    أم عبدالرحمن:لا..هذول صاحباتها بالمدرسة..يازينهم ويازين جلستهم كلامهم يونس..كنت عندهم فوق بس حسيت انهم يبون ياخذون راحتهم بالسوالف فاستأذنت ونزلت...
    عبدالرحيم:طيب يمه ماتدرين سيارة مين فيهم هذي اللي كانت بره؟؟
    أم عبدالرحمن:لا مدري..بس انت وشفيك تسألني من أول؟عسى ماشر؟؟
    عبدالرحيم:بصراحة؟انتي تعرفيني ماأحب ألِف وأدور..أنا ظنيت الضيوف عندك وبيطلعون استحيت ورحت للحوش الخلفي بانتظار يخرجون من عندك وبعدين أدخل أنا!بس تفاجئت إن فيه وحدة نازلة من فوق في الدرج وناظرتها من غير قصد..وكانت حلوة يمه..حلوة مرة!!!!
    أم عبدالرحمن:يوووووه الله يلعن ابليس!عسى شافتك وانت تناظرها؟الحين وش يقولون عنَّا الناس؟عيال أم عبدالرحمن عيونهم زايغة؟؟؟
    عبدالرحيم:يمه الله يهديك لاتفهميني غلط أنا ناظرت بدافع الفضول لأني أسمع صوت بالدرج بس عيوني تسمرت عليها والنظرة الأولى لي..وبعدين غضيت بصري!بس يمين ماقصدت آآذي بنت الناس وأتمقل فيها!!والصراحة هي حياوية أول ماشافتني غطت وجهها وراحت تركض بسرعة للباب
    أم عبدالرحمن:الله يغفر لك ان شاء الله...
    عبدالرحيم:يمه ماتدرين ان كانت متزوجة أو مخطوبة؟؟
    أم عبدالرحمن:أقول؟أشوفك كثرت أسئلة حول بنت الناس؟لايكون معجبتك؟؟
    عبدالرحيم:حيــــــــــــــــل يمه!أقول لك حلوة حلوة وحشيمة!!!!
    قالت أم عبدالرحمن بنفسها:فشيلة لاتكون نجلاء وينصدم إنا مابنقدر نخطبها له لأننا سبق وخطبناها لعبدالمجيد!!!!
    قامت أم عبدالرحمن واتصلت على اسمهان وبعد السلام:اسمهان حبيبتي الشغالة انتهت؟ ولا لسه؟
    اسمهان:ايه خلاص انتهت بس واقفة تكنس مجلس الحريم..تبينها الحين خالتي؟؟
    أم عبدالرحمن:لا بس أول ماتنتهي خليها تنزل لأن عبدالرحيم توه واصل من السفر وأبيها تجهز لنا العشا..ماشاء الله ضيوفك راحوا؟؟
    اسمهان:ايه راحوا من أول..آخر وحدة خرجت من عندي قبل شوي كانت مرام..تأخر عليها السواق..بس أشوى ماجاء عبدالرحمن وهي موجودة كان انحرجت مسكينة..
    أم عبدالرحمن:ياحليلهم صاحباتك انتي أول وحدة تزوجتي فيهم وأشوفهم فرحانين فيك.. بس مافيه وحدة منهم زواجها قريب؟؟
    اسمهان:لاااا..ولاوحدة مخطوبة منهم أصلاً!!!
    أم عبدالرحمن:يلا الله يكتب لهم اللي فيه الخير..
    ===========
    قامت اسمهان وعبت صحنين كبيرة من كل الأشكال والأصناف الحالية والمالحة اللي عندها وعطتهم الشغالة تنزلهم لأم عبدالرحمن على العشا..وراحت الشغالة وقامت اسمهان تغير هدومها وتستعد لحضور عبدالرحمن من العمل..ورتبت الأكل على طاولة السفرة وحطت معاه كاستين عصير وجابت الشمعدانات الجديدة اللي أهدتها اياها نجلاء وولعت الشموع اللي فيها وجابت باقة الورد اللي جابتها مرام وحطتها بعد على طاولة السفرة وطفت الأنوار وجلست على ضوء الشموع تنتظر عبدالرحمن..
    وآثاري عبدالرحمن يوم جاء شاف سيارة عبدالرحيم واقفة عندالباب وفرح ودخل على أمه وسلم على أخوه وعبدالمجيد وكانوا جالسين يتعشون وقعد يتعشى معاهم..!
    وبعد وقت درى من أمه ان ضيوف اسمهان راحوا!!!!واستأذن وطلع لزوجته اللي زهقت من الانتظار وحطت راسها على الطاولة و غفت!!!!
    وفتح الباب ولقي الدنيا مظلمة!ومافي نور إلا نور الشموع واسمهان رايحة فيها وحاطة راسها على الطاولة ونايمة!!!!
    وراح عبدالرحمن يتسحب لغرفة النوم وغير هدومه وجاء سحب كرسي وجلس قدام اسمهان..وهي مو حاسة فيه!
    وقام يغني:
    سمهونتي خبريني
    سمهونتي خبريني
    بـ......................
    وفزت اسمهان من الخرعة وقالت:بسم الله!!!!!
    وطاح الشمعدان وولعت الشمعة بمفرش الطاولة وقام عبدالرحمن يركض يبي يطفي النار اللي شبت واسمهان تصرخ!!
    وطفى النار وولع اللمبة وقام يهَّديها!!
    اسمهان:حسبي الله على ابليسك!ليش ماطقيت الباب قبل لاتدخل؟ومتى مداك تغير هدومك؟
    عبدالرحمن:وش أسوي لك؟قلت أبي أفاجئك بحضوري لقيتك حاطة راسك على الطاولة وتشخرين!!
    اسمهان:زين إقعد نتعشى!
    عبدالرحمن:لا..الحمدلله تعشيت تحت مع أمي وأخواني!
    اسمهان:ياشينك! وأنا اللي ماحطيت بفمي لقمة مع الضيوف قلت أنتظرك وناكل سوى!!
    عبدالرحمن:مايخالف..تعشي انتي بالعافية..أنا ظنيت ان ضيوفك لسه عندك!!
    وقامت اسمهان توريه هداياهم اللي جابوها,,,
    عبدالرحمن:جزاهم الله خير ماقصروا..مو هم نفسهم اللي جابوا لك الصندوق الوردي الكبييير اللي معبى هدايا بيوم عرسنا؟؟
    اسمهان:ايه..هُم..
    عبدالرحمن:ماكان له داعي يكلفون على أنفسهم اليوم بعد ويجيبون شي ثاني..الله يعوض عليهم ان شاء الله..
    وشوي قال عبدالرحمن:يووووه تذكرت!!
    ونزل للسيارة وجايب معاه باقة ورد كبيرة وكيس!
    استغربت اسمهان وقالت:وش هذا؟
    عبدالرحمن:اليوم الزملاء في القسم احتفلوا فيني احتفال صغير بمناسبة الزواج وجابوا جاتوه وعصيرات وباقة الورد هذي..
    اسمهان:حلوة ألوان الورد مرة...
    وأخذتها وحطتها على الطاولة..
    وقام عبدالرحمن ناولها الكيس وقال:هذي هدية بسيطة مني ان شاء الله تعجبك!
    فتحت اسمهان الكيس وطلعت منه علبة كبيرة مربعة وفتحتها لقيت بداخلها دفتر كبير سماوي وصفحاته فيها رسومات ورد شفافة!!
    وقالت:اش هذا دحومي؟؟جايب لي أوتوجراف؟؟
    عبدالرحمن:هو صحيح شكله أوتوجراف..بس أنا جايبه لك تستخدمينه استخدام ثاني!!
    اسمهان:شلون يعني؟
    عبدالرحمن:الصراحة قلت بنفسي بدل مايمر عليك اليوم بغيابي وتقضينه على النت في هواشات ومناقر مع العضوات وماتثمنون كلامكم ولاتحسون إنكم محاسبين على كل كلمة تلفظونها..أجيب لك هالدفتر وتخلينه مُذكرة للفوائد!
    اسمهان:أكذب عليك لو قلت لك إني فاهمة شي!!
    عبدالرحمن:يعني كل يوم من باب اثراء حصيلتك اللغوية والمعرفية قبل ماأروح العمل بآخذ هالدفتر وأكتب لك فيه كلمات وانتي عليك تدورين معانيها في النت وتسجلينها بخطك في الدفتر!
    اسمهان:وليش عاد فرة الراس هذي؟ بأطبعهم لك بورق وأعطيك اياهم!!
    عبدالرحمن:ياحياتي أنا عارف معانيهم ومو محتاج لهم!أنا متعمد أطلب منك تكتبينها بخط يدك بهذي المذكرة عشان تثبت المعلومة بذهنك وتسير هذي المذكرة مرجع لك بعدين وبتلاقين إنك بفترة بسيطة اكتسبتي عدد كبير من المعلومات بطريقة سهلة بالإضافة إلى إنها وسيلة مفيدة لشَغل وقت الفراغ وتثقيف نفسك دينياً ودينيوياً!!!!
    اسمهان:بس إنت كأنك تحسسني إني ماأعرف شي!
    عبدالرحمن:مو بس انتي اللي ماتعرفين كل البشر مهما تعلموا يظل هناك فيه أشياء مايعرفونها..الله قالها بكتابه(وماأوتيتم من العلم إلا قليلا)..والشافعي اللي كان من علماء المسلمين وفقهائهم قال:
    كلما ازددت علماً...ازددت علماً بجهلي!!
    وراحوا العروسين غرفة نومهم يتسامرون إلى أن غلبهم النعاس!
    =============
    نجي لسماح اللي لما خرجت من بيت اسمهان راحت لبيت أختها هند وكان عند هند عدد كبير من الضيوف وأمها(أم تركي)...وبعد ماراحوا ضيوف هند بقي عندها سماح وأم تركي بس..فقاموا يسولفون....
    أم تركي:شلون اسمهان ياسماح يوم شفتيها؟عساها مبسوطة؟؟
    سماح:ايه ماشاء الله..مبسوطة..
    هند:ومين كان عندها؟أهلها؟
    سماح:لا ..أم زوجها وصاحباتها..بس تتذكرين يمه البنت اللي كانت لابسة وردي بملكة اسمهان وحاطة شال على كتفها؟
    أم تركي:لا نسيت!وشفيها؟؟
    سماح:يمه لاتقولين نسيتيها..انتي بنفسك قلتي لي:لو عندي ولد ثاني غير تركي كان خطبتها له!صح؟؟؟؟
    أم تركي:ايه ايه ذكرتها..
    هند:أكيد ياسماح تقصدين انك تبين نخطبها لتركي صح؟؟
    سماح:ايه والله ياليت.. عجبني هدوئها..مافيها جراءة عبير..وأهلها حسب ماأعرف من اسمهان انهم ناس ملتزمين يعني بيخافون الله في تركي موب مثل أم عبير الله يصلحها..
    هند:ياليت تركي يوافق كان أخطبها له الليلة!!
    أم تركي:أنا أقول العجلة مالها داعي!مشكلته مع عبير ماصار لها شهر..خليه يرتاح شوي وعقبها يصير خير!
    ============

    يتبع بإذن الله

     
  2. جاري تحميل الصفحة...

    مواضيع مشابهة في منتدى التاريخ
    رواية اسمهان وعبدالرحمن الحلقة (42 ) شرفة القصص القصيرة والروايات ‏3 مارس 2016
    رواية اسمهان وعبدالرحمن الحلقة 36 شرفة القصص القصيرة والروايات ‏11 فبراير 2016
    رواية اسمهان وعبدالرحمن الحلقة 35 شرفة القصص القصيرة والروايات ‏11 فبراير 2016
    رواية اسمهان وعبدالرحمن الحلقة 34 شرفة القصص القصيرة والروايات ‏11 فبراير 2016
    رواية اسمهان وعبدالرحمن الحلقة 33 شرفة القصص القصيرة والروايات ‏11 فبراير 2016

أختي .. فضلاً منكِـ ، إن أعجبكِ موضوعي قيميه من هنَا :
/5,

مشاركة هذه الصفحة